Kapitujt

1 e Korintasve: 11. Themelimi i Darkës së Zotit

¹ Më përngjani mua, sikurse unë i përngjaj Krishtit.

Si duhet të rrijë burri e gruaja në praninë e Hyjit

² Ju lavdëroj që më kujtoni në gjithçka dhe që i ruani traditat ashtu si jua kam pasë mësuar. ³

Por dua që ta dini:

kryetari i çdo njeriu është Krishti, kryetari i gruas është burri e kryetari i Krishtit është Hyji. ⁴ Çdo burrë që lutet apo profetizon me kokë të mbuluar, turpëron kryetarin e vet. ⁵ Çdo grua që lutet apo profetizon me kokë të zbuluar, turpëron kryetarin e vet: sepse është njësoj sikurse t’i kishte qethur flokët. ⁶ E po ndodhi që ndonjë grua nuk do ta mbulojë kokën, le të qethet; por, në qoftë se është turp për gruan ta qethë e ta rruajë kokën, atëherë le të mbulohet.

⁷ Përkundrazi, burri nuk ka nevojë ta mbulojë kokën sepse është shëmbëlltyra e lavdisë së Hyjit; ndërsa gruaja është nderi i burrit. ⁸ Sepse nuk është burri prej gruas, por gruaja prej burrit. ⁹ Dhe burri nuk u krijua për arsye të gruas, por gruaja për arsye të burrit. ¹⁰ Prandaj, gruaja duhet ta mbajë mbi kokë shenjën e “vartësisë”, për shkak të engjëjve. ¹¹ Megjithëse, në Zotin, as s’është burri i pavarur nga gruaja e as gruaja nga burri. ¹² Sepse, sikurse gruaja që është prej burrit, ashtu edhe burri lind prej gruas: e gjithçka vjen prej Hyjit.

¹³ Gjykoni ju vetë: a ka hije që gruaja të lutet para Hyjit me kokë të zbuluar? ¹⁴ Po a nuk ju mëson edhe vetë natyra, se nuk i ka hije mashkullit t’i lërë flokët e gjatë, ¹⁵ kurse për femrën flokët e gjatë janë nder, sepse [asaj] i qenë dhënë si mbulesë. ¹⁶ Por, në qoftë se ndokush mendon se ka të drejtë të kundërshtojë, le ta dijë se ky zakon nuk është ndër ne as në kishat e Hyjit.

Shpërdorimi i Darkës së Zotit

¹⁷ E, pasi jam duke i dhënë këto vërejtje, nuk mund t’ju lavdëroj: bashkimet tuaja nuk po ju sjellin dobi shpirtërore, por më tepër dëm. ¹⁸ Më së pari po dëgjoj ‑ e pjesërisht e besoj ‑ se kur bashkoheni në Mbledhje paska mes jush mosmarrëveshje. ¹⁹ Njëmend, duhet të jenë ndër ju dasi, në mënyrë që të dalin në shesh [edhe] ata që ndër ju janë të krishterë të vërtetë. ²⁰ Kur ju, pra, mblidheni së bashku kështu, kjo gjë nuk do të thotë se hani Darkën e Zotit, ²¹

pasi, secili, kur merr pjesë në Darkë, kërkon të hajë një herë ushqimin që ka sjellë me vete, kështu që, dikush mbetet i uritur e tjetri dehet. ²² Po a thua nuk keni shtëpi për të ngrënë e për të pirë? A mos doni të përbuzni Kishën e Hyjit e t’i turpëroni ata që nuk kanë? Çka t’ju them? T’ju lavdëroj? Në këtë gjë s’ju lavdëroj.

Themelimi i Darkës së Zotit

(Mt 26, 26‑29; Mk 14, 22‑25; Lk 22, 14‑20)

²³ Vërtet atë mësim që mora prej Zotit, atë edhe juve jua mësova, domethënë se Zoti Jezus, atë natë që po tradhtohej, mori bukën, ²⁴ falënderoi, e theu dhe tha: “Ky është Trupi im ‑ për ju. Bëjeni këtë në përkujtimin tim!” ²⁵ Po ashtu, pasi u krye darka, mori edhe kelkun e tha: “Ky Kelk është Besëlidhja e re në Gjakun tim. Bëjeni këtë, gjithsaherë që të pini, në përkujtimin tim!” ²⁶ Për të vërtetë, kurdo të hani këtë bukë e ta pini këtë kelk, lajmëroni vdekjen e Zotit, derisa Ai të vijë.

Pjesëmarrja e padenjë në Darkën e Zotit

²⁷ Prandaj, kushdo ha bukën ose pi kelkun e Zotit padenjësisht, do të jetë fajtor i Trupit e i Gjakut të Zotit. ²⁸ Për këtë arsye secili më së pari ta shqyrtojë mirë veten e veç atëherë të hajë prej kësaj Buke e të pijë prej këtij Kelku. ²⁹ Sepse, kushdo ha e pi ‑ në qoftë se nuk e dallon Trupin e Zotit prej ushqimeve të tjera ‑ ha e pi dënimin e vet. ³⁰ Ja, pra, arsyeja pse shumë prej jush janë të dobët, shumë të sëmurë, madje shumë edhe vdesin. ³¹ E pra, po ta shqyrtonim mirë veten, nuk do të dënoheshim. ³²

E kur na gjykon Hyji, na edukon, që të mos dënohemi bashkë me botën.

³³ Prandaj, vëllezërit e mi, kur të bashkoheni në Darkë, priteni njëri‑tjetrin. ³⁴ E, nëse ndokush është i uritur, le të hajë në shtëpi, në mënyrë që të mos bashkoheni për dënim.

Të tjerat do t’i rregulloj kur të vij.

Kapitujt