Kapitujt

Esdra: 7. Detyra dhe personaliteti i Esdrës

¹ Pas këtyre ngjarjeve, nën sundimin e Artakserksit, mbretit të persianëve, Esdra, biri i Sarajës, të birit të Azarisë, të birit të Helcisë, ² të birit të Selumit, të birit të Sadokut, të birit të Akitobit, ³ të birit të Amarisë, të birit të Azarisë, të birit të Marajotit, ⁴ të birit të Zarahisë, të birit të Oziut, të birit të Bokcit, ⁵ të birit të Abisuehit, të birit të Fineesit, të birit të Eleazarit, të birit të Aronit kryeprift: ⁶ ky, Esdra, u kthye nga Babiloni. Ishte skrib i aftë në Ligjin e Moisiut që e ka dhënë Zoti, Hyji i Izraelit, dhe, pasi dora e Zotit, Hyjit të tij, ishte mbi të, mbreti ia plotësoi të gjitha kërkesat e tija. ⁷ Në vitin e shtatë të sundimit të mbretit Artakserks, erdhi një grup izraelitësh, priftërinjsh, levitësh, këngëtarësh, derëtarësh e të dhuruarish në Jerusalem. ⁸ Erdhi në Jerusalem në të pestin muaj të të shtatit vit të mbretit. ⁹ U nis prej Babilonit të parën ditë të muajit të parë dhe arriti në Jerusalem në ditën e parë të muajit të pestë: dora bamirëse e Hyjit të tij ishte mbi të. ¹⁰ E njëmend Esdra ishte dhënë mend e zemër për ta shqyrtuar Ligjin e Zotit e për ta vënë në zbatim, për t’ua mësuar izraelitëve ligjet dhe rregulloret.

Dokumenti i Artakserksit

¹¹ Kjo është dysheritja e dokumentit që mbreti Artakserks ia dha Esdrës prift, skribit të ditur në tekstin e urdhërimeve të Zotit e në ligjet e tija lidhur me Izraelin.

¹² “Artakserksi, mbreti i mbretërve,

Esdrës prift, skribit të Ligjit të Hyjit të qiellit, shëndet!

¹³ Unë e kam dhënë këtë urdhër: Kushdo në mbretërinë time që është i popullit të Izraelit, priftërinj e levitë nëse dëshirojnë të shkojnë në Jerusalem, le të vijnë me ty. ¹⁴ Përveç kësaj ty të dërgon mbreti dhe shtatë këshilltarët e tij që ta mbikëqyrësh Judenë dhe Jerusalemin sipas Ligjit të Hyjit tënd, që e ke në dorë ¹⁵ dhe të çosh argjendin dhe arin që mbreti dhe këshilltarët e tij vullnetarisht ia kushtojnë Hyjit të Izraelit, që e ka selinë në Jerusalem, ¹⁶ si edhe krejt argjendin e arin që do ta mbledhësh në krahinën e Babilonit bashkë me kushtet e dhuruara vullnetarisht nga populli dhe priftërinjtë, për Shtëpinë e Hyjit tënd që është në Jerusalem.

¹⁷ Kështu, pra, me kujdes bli me këto para mëzetër, desh, qengja, fli kushtimore dhe njomje të nevojshme, dhe vendosi mbi lterin e Tempullit të Hyjit tënd, që është në Jerusalem. ¹⁸ Lidhur me argjendin dhe arin që do të teprojë, përdorojeni si të duket mirë ty dhe vëllezërve të tu, sipas vullnetit të Hyjit tuaj. ¹⁹ Po edhe enët që po të jepen për shërbesat e Shtëpisë së Hyjit tënd, vëri para Hyjit në Jerusalem. ²⁰ Po edhe gjëra të tjera që duhen për Shtëpinë e Hyjit tënd dhe që ty të takon t’i blesh, të gjitha shpenzimet le të jepen prej thesarit të mbretit. ²¹ Jam unë vetë, mbreti Artakserks, që ua jap këtë urdhër të gjithë arkëtarëve të Përtejlumit: çfarëdo që të kërkojë prifti Esdra, skribi i Ligjit të Hyjit të qiellit, t’ia jepni pa vonesë, më saktësisht ²² deri në njëqind talenta argjend, njëqind kora grurë, deri njëqind bata verë dhe deri njëqind bata vaj, ndërsa kripë sipas dëshirës. ²³ Gjithçka të urdhërojë Hyji i qiellit le të zbatohet menjëherë në Shtëpinë e Hyjit të qiellit, që hidhërimi i tij të mos vijë rastësisht në mbretërinë tonë dhe kundër fëmijëve të tij. ²⁴ Jua bëjmë po ashtu, të ditur, se askush s’ka të drejtë t’u kërkojë tatime, taksa e dogana priftërinjve, levitëve, këngëtarëve, derëtarëve, të dhuruarve dhe shërbëtorëve të kësaj Shtëpie të Hyjit.

²⁵ Kurse ti, Esdra, me mençurinë që ta ka dhënë Hyji i yt, caktoji zyrtarët dhe gjykatësit që ta udhëheqin mbarë popullin që ka mbetur Përtej lumin, d. t. th. të gjithë ata që e njohin Ligjin e Hyjit tënd. Atyre që nuk e njohin, e keni për detyrë t’ua mësoni. ²⁶ Secilit që nuk do ta mbajë Ligjin e Hyjit tënd, pra pikërisht edhe ligjin e mbretit, le të dënohet ose me vdekje, ose me mërgim, ose me gjobë ose me burgim”.

Udhëtimi i Esdrës nga Babilonia në Palestinë

²⁷ Qoftë bekuar Zoti, Hyji i etërve të mi, që e frymëzoi zemrën e mbretit për ta nderuar Shtëpinë e Zotit që është në Jerusalem, ²⁸ i cili e ktheu kah unë përkrahjen e mbretit, të këshilltarëve të tij dhe të mbarë prijësve të tij të fuqishëm! Atëherë unë fitova forcë e guxim, sepse dora e Zotit, e Hyjit tim, ishte mbi mua dhe i bashkova disa krerë, prej Izraelit, të cilët erdhën me mua.

Kapitujt