Kapitujt

Esdra: 6. Pashkët e vitit 515

¹ Atëherë mbreti Dari dha urdhër dhe u kërkuan arkivat e Babilonisë, ² kështu në Ekbatanë, në fortesën e krahinës së Medisë, u gjet një vëllim, në të cilin ishte shkruar:

“Le të dihet.

³ Në vitin e parë të mbretit Kir, mbreti Kir mori këtë vendim lidhur me Shtëpinë e Hyjit që është në Jerusalem:

Le të ndërtohet Shenjtërorja ku do të kushtohen fli. Lartësia e saj le të jetë gjashtëdhjetë kute e gjerësia gjashtëdhjetë kute. ⁴ Tre rreshta le të jenë prej gurësh të mëdhenj katrorë e një prej druri. Shpenzimet i heq Shtëpia e mbretit. ⁵ Për më tepër orenditë e Tempullit të Hyjit të arta e të argjendta, që Nabukodonozori i ka pasë marrë prej Tempullit të Jerusalemit e i ka pasë sjellë në Babilon, le të kthehen e le të çohen në Tempullin e Jerusalemit, në vendin e vet, në Tempullin e Hyjit”.

⁶ Tani, pra, ti Tatanaj, prijës i krahinës së Përtejlumit, ti Starbuzanaj e ju këshilltarët e tij dhe të gjithë ju prijës të Përtejlumit, largohuni nga ai vend ⁷ e mos e pengoni rindërtimin e atij Tempulli të Hyjit. Prijësi i judenjve dhe paria e tyre le ta ndërtojnë Shtëpinë e Hyjit në vendin e vet. ⁸ Dhe ja, urdhërat e mi se si duhet ju të silleni ndaj parisë së judenjve që po e rindërtojnë atë Tempull të Hyjit: atyre njerëzve me kujdes e pa ndërprerje le t’u jepen shpenzimet nga arka e mbretit, d. t. th. nga tatimet që mblidhen në krahinën e Përtejlumit. ⁹ Si dhe, gjithë çka është e nevojshme, qoftë mëzetër, desh e qengja për fli shkrumbimi në nder të Hyjit qiellor, qoftë grurë, kripë, verë, vaj, sipas urdhrit të priftërinjve që janë në Jerusalem, le t’u jepen çdo ditë rregullisht. ¹⁰ Ata le t’i kushtojnë Hyjit qiellor fli të këndshme dhe le të luten për jetën e mbretit e të bijve të tij. ¹¹ Jap edhe këtë urdhër: kushdo që do ta shkelë këtë urdhër, le t’i hiqet prej shtëpisë së tij një tra, dhe le të ngulet në të, kurse shtëpia e tij le të kthehet në vend plehërash. ¹² Ndërsa Hyji, që e ka vendosur Emrin e tij të banojë aty, i shkatërroftë të gjitha mbretëritë dhe atë popull që ta shtrijë dorën e vet për ta përbuzur e për ta rrënuar Shtëpinë e Hyjit në Jerusalem.

Unë Dariu e dhashë këtë urdhëresë. Dua që të zbatohet pikë për pikë”.

¹³ Kështu Tatanaji, qeveritari i krahinës së Përtejlumit, prijësit dhe këshilltarët e tij, i zbatuan me kujdes gjithçka kishte urdhëruar mbreti Dari. ¹⁴ Pleqtë e judenjve vazhduan ndërtimin e Tempullit të përkrahur me guxim nga profeti Agjé dhe nga Zakaria, biri i Ados. E kryen ndërtimin me urdhrin e Hyjit të Izraelit dhe me urdhër të Kirit, të Dariut e të Artakserksit, mbretërve të përsianëve. ¹⁵ E përfunduan ndërtimin e Shtëpisë së Hyjit, të tetën ditë të muajit Adar, d. t. th. në vitin e gjashtë të mbretërimit të mbretit Dari.

¹⁶ Atëherë bijtë e Izraelit ‑ priftërinj, levitë e të tjerët të riatdhesuar nga mërgimi me gëzim të madh e bënë kushtimin e kësaj Shtëpie të Hyjit. ¹⁷ Në shugurimin e kësaj Shtëpie të Hyjit i kushtuan njëqind mëzetër, dyqind desh, katërqind qengja dhe, si fli shpërblyese për mëkatet e mbarë Izraelit, dymbëdhjetë cjep, sipas numrit të fiseve të Izraelit. ¹⁸ Pastaj i caktuan priftërinjtë sipas rendeve të tyre dhe levitët sipas veshjes së tyre në shërbimin e Hyjit në Jerusalem ashtu si shkruan në Librin e Moisiut.

Pashkët e vitit 515

¹⁹ Izraelitët e riatdhesuar nga mërgimi i kremtuan Pashkët në ditën e katërmbëdhjetë të muajit të parë. ²⁰ Të gjithë levitët u pastruan. Të pastruar të gjithë, flijuan Pashkët për të gjithë të riatdhesuarit, për vëllezërit e vet priftërinjtë dhe për vete. ²¹ E hëngrën pashkën të gjithë bijtë e Izraelit që u kthyen nga skllavëria si edhe të gjithë ata që kaluan nga ndyrësitë e paganëve e u bashkuan me ta për ta kërkuar Zotin, Hyjin e Izraelit. ²² Me gëzim të madh e kremtuan festën e të Pabrumeve për shtatë ditë, sepse Zoti i kishte ngushëlluar ata duke e prirur zemrën e mbretërve të Asirisë ndaj tyre për t’u ndihmuar atyre në veprën e rindërtimit të Shtëpisës së Zotit, Hyjit të Izraelit.

Kapitujt