Kapitujt

Esdra: 4. Samaritanët kundërshtojnë dhe pengesat e tyre në kohën e Kirit

¹ Kur armiqtë e Judës e të Beniaminit e morën vesh se të humburit e riatdhesuar po e ndërtonin Tempullin e Zotit, Hyjit të Izraelit, ² iu paraqitën Zorobabelit dhe krerëve të familjeve e u thanë: “Bashkë me ju dëshirojmë ta ndërtojmë Shtëpinë e Zotit, sepse edhe ne si ju e kërkojmë Hyjin tuaj, dhe i kemi kushtuar fli që prejkohës së Asorhadanit, mbretit të Asirisë, i cili na solli këtu”.

³ Zorobabeli, Jezuai dhe krerët e tjerë të familjeve të Izraelit u përgjigjën: “Nuk bën që ju e ne së bashku ta ndërtojmë Shtëpinë e Hyjit tonë, por do ta ndërtojmë ne vetëm Shtëpinë e Hyjit të Izraelit si na ka urdhëruar Kiri, mbreti i Persisë”.

⁴ Atëherë popullsia e vendit filloi ta trembë popullin e Judës e ta pengojë në ndërtim. ⁵ Paguan disa nga këshilltarët kundër tyre për t’ua çuar kot synimet. Kështu ndodhi gjatë krejt kohës së Kirit, mbretit të Persisë, deri në mbretërimin e Dariut, mbretit të Persisë.

Pengesat e samarianëve në kohën e Asuerit dhe të Artakserksit

⁶ Në kohën e mbretërimit të Asuerit, në fillim të mbretërimit të tij, e shkruan padinë kundër banorëve të Judës dhe të Jerusalemit. ⁷ Edhe në kohën e Artakserksit, Beselami, Mitridati, Tabeli, dhe shokët e tjerë që ishin në këshillin e tyre, i shkruan Artakserksit, mbretit të Persisë. Padia ishte e shkruar me shkronja siriane e në gjuhë siriane.

⁸ Pastaj qeveritari Reum dhe sekretari Samsaj i shkruan mbretit Artakserks një letër kundër Jerusalemit me këtë përmbajtje:

⁹ “Qeveritari Reum, sekretari Samsaj dhe shokët e tjerë të tyre, gjykatës e zyrtarë e delegatë persianë, erkuenj, babilonas, suzanekenj ‑ d. m. th. elamitë ¹⁰ dhe të tjerë nga popujt që i madhi e i lavdishmi Asenafar i solli dhe i vendosi të banojnë në paqe në qytetet e Samarisë dhe në krahinat e tjera të Përtejlumit”.

¹¹ Kjo është dysheritja e letrës që i dërguan:

“Mbretit Artakserks, shërbëtorët e tij, njerëzit nga Përtejlumi:

Tani, pra, ¹² po njoftohet mbreti se judenjtë, që u nisën prej teje tek ne, arritën në Jerusalem, qytet kryengritës e tejet i mbrapshtë që po e ndërtojnë. Tashmë i kanë hedhur themelet dhe po i ndreqin muret. ¹³ Tani le ta dijë mbreti: nëse ky qytet ndërtohet dhe nëse i përtërihen muret, nuk do të këtë tatime, nozullime, as doganë dhe në fund do të jetë në dëm të thesarit mbretëror. ¹⁴ Pasi ne hamë kripën e pallatit mbretëror, e vlerësojmë si punë të pandershme të shikojmë se si i bëhet fyerje mbretit, prandaj edhe ia dërgojmë mbretit këto njoftime ¹⁵ që t’i shikosh librat e historive të etërve të tu dhe në ato histori do të gjesh e do të kuptosh se ky qytet është qytet kryengritës dhe shkak dëmesh për mbretërit e për krahinat dhe se në të që moti janë bërë kryengritje; këndej edhe qyteti ka qenë rrënuar. ¹⁶ Ne ia bëjmë të ditur mbretit se, në qoftë se ky qytet do të rindërtohet e nëse do t’i ripërtërihen muret, nuk do të kesh më prona Përtejlumit.”

¹⁷ Mbreti ia dërgoi këtë përgjigje qeveritarit Reum, sekretarit Samsaj dhe tjerëve që ishin në këshillin e tyre dhe banonin në Samari dhe në krahinën e Përtejlumit:

“Paqe!

Dokumenti ¹⁸ që e dërguat tek ne, u lexua me kujdes para meje. ¹⁹ Unë dhashë urdhër qe të kërkohet dhe u gjet se ai qytet që prejkohëve të lashta ka bërë kryengritje kundër mbretërve dhe se janë bërë gërgyle e trazira në të. ²⁰ Madje në Jerusalem ka pasur edhe mbretër të fuqishëm se kanë mbretëruar me mbarë krahinën që është Përtejlumit dhe se kanë marrë tatime, taksa e dogana. ²¹ Tani jepni urdhër që ata njerëz ta ndërpresin punën dhe të mos ndërtohet ai qytet deri sa unë të jap tjetër urdhër. ²² Ia vini mirë mendjen të mos jini në këtë gjë të pakujdesshëm që të mos rritet e keqja në dëm të mbretërve”.

²³ Pasi u lexua dysheritja e urdhëresës së mbretit Artakserks, para qeveritarit Reum, sekretarit Samsaj dhe këshilltarëve të tyre, ata me nxitim shkuan në Jerusalem te judenjtë dhe ua ndaluan punimet me forcë e me armë. ²⁴ Kështu u ndërpre puna në ndërtimin e Shtëpisë së Zotit në Jerusalem dhe nuk u punua gjë deri në vitin e dytë të mbretërimit të Dariut, mbretit të Persisë.

Kapitujt