Kapitujt

1 e Korintasve: 16. Porositë e fundit dhe përshëndetjet

¹ Për sa i përket mbledhjes së ndihmave për shenjtër bëni edhe ju si u kam urdhëruar kishave të Galacisë. ² Të parën ditë të secilës javë, secili prej jush të ndajë sa të ketë mundur të kursejë, në mënyrë që të mos mblidhen vetëm kur të vij vetë. ³ Kur të vij do t’i dërgoj me letërpërcjellëse ata që ju t’i zgjidhni për ta çuar dhuratën tuaj në Jerusalem. ⁴ Po qe më mirë të shkoj edhe vetë, do të vijnë me mua.

Planet e veprimtarisë

⁵ Te ju do të vij posa ta kaloj Maqedoninë. Maqedoninë vetëm do ta përshkoj ⁶ e te ju dua të ndalem, ndoshta edhe të dimëroj, që ju të përgatitni sa më lypet për vazhdimin e udhëtimit tim. ⁷ Dhe, vërtet, nuk doja t’ju shoh vetëm në kalim. Në të vërtetë, shpresoj se, me ndihmë të Zotit, do të qëndroj për disa kohë në mesin tuaj. ⁸ Deri për Rrëshajë do të qëndroj në Efes, ⁹ pasi m’u dha rasti i mrekullueshëm të veproj e kundërshtarët janë të shumtë.

¹⁰ Nëse vjen te ju Timoteu, kujdesuni që të jetë pa frikë në mesin tuaj, sepse kryen, porsi unë, veprën e Zotit. ¹¹ Askush, pra, të mos e përbuzë. Jepini çka i lypet për udhëtim e të vijë në paqe te unë, sepse e pres unë e vëllezërit.

¹² Për sa i përket vëllait Apol, mjaft e nxita të vijë te ju me vëllezër, por kurrsesi nuk deshi të vinte tani, por do të vijë kur të ketë rast të volitshëm.

Porositë e fundit dhe përshëndetjet

¹³ Rrini zgjuar! Qëndroni të palëkundshëm në fe! Bëhuni burra! Jini të fortë! ¹⁴ Bëni gjithçka me dashuri!

¹⁵ Vëllezër, edhe një porosi: e dini se familja e Shtjefnës është fryti i parë i Akajës dhe se iu kushtua shërbimit të shenjtërve ‑ ¹⁶ nderojini të tillët dhe secilin që bashkëpunon dhe vepron për fe. ¹⁷ Jam shumë i kënaqur për ardhjen e Shtjefnës, të Fortunatit e të Ahaikut, sepse ata e plotësuan mungesën tuaj: ¹⁸ e qetësuan shpirtin tim dhe tuajin. Prandaj nderojini të tillët!

¹⁹ Ju përshëndesin kishat e Azisë. Ju përshëndesin së tepërmi në Zotin Akuila e Priska bashkë me kishën që bashkohet në shtëpinë e tyre. ²⁰ Ju bëjnë të fala të gjithë vëllezërit. Përshëndeteni njëri‑tjetrin me puthje të shenjtë.

²¹ Të fala me dorën time ‑ Pali.

²² Kush nuk e do Jezu Krishtin, qoftë

mallkuar!

Maranà tha!

²³ Hiri i Zotit Jezu Krisht qoftë me ju!

²⁴ Ju dua të gjithëve në Jezu Krishtin.

Kapitujt