Kapitujt

1 e Korintasve: 10. Qortim rreth idhujtarisë

¹ Vëllezër, dua që patjetër ta dini: etërit tanë të gjithë qenë nën re, të gjithë kaluan nëpër det ²

dhe të gjithë qenë pagëzuar në Moisiun me re e me det ³ dhe të gjithë hëngrën të njëjtin ushqim shpirtëror, ⁴ dhe të gjithë pinë të njëjtën pije shpirtërore: pinin nga qeta shpirtërore që i përcillte: qeta ishte Krishti. ⁵ Por shumica nuk i pëlqeu Hyjit, pasi qenë vrarë në shkretëtirë. ⁶ Të gjitha këto ndodhën si shembull për ne, që ne të mos e lakmojmë të keqen, siç e lakmuan ata. ⁷ As mos u bëni idhujtarë, sikurse disa prej tyre, si është në Shkrim e Shenjtë:

‘U ul populli të hajë e të pijë,

pastaj u ngritën të lozin.’

⁸ As mos të jepemi pas fëlligështisë, siç u dhanë disa prej tyre, e mbaruan në një ditë njëzet e tri mijë vetë. ⁹ As mos ta vëmë në provë Zotin, sikurse disa prej tyre e sprovuan dhe sharruan prej gjarpërinjsh. ¹⁰ As mos murmurisni siç murmurisin disa prej tyre dhe engjëlli Shfarues i vrau.

¹¹ Të gjitha këto u ndodhën atyre që të shërbejnë si shembull e u shkruan për mësimin tonë, për të cilët arriti mbarimi i kohës.

¹² Kush, pra, mendon se qëndron, të ruhet që të mos rrëzohet! ¹³

Vështirësitë në të cilat qetë vënë, nuk ishin jashtë masës njerëzore. Hyji është besnik. Ai nuk do të lejojë t’u nënshtroheni provave që i tejkalojnë fuqitë tuaja e, bashkë me provat, do t’ju japë rrugëdalje e forcë për t’u qëndruar.

¹⁴ Prandaj, o të dashurit e mi, ikni nga idhujtaria! ¹⁵ Flas me ju si me njerëz të arsyeshëm: gjykoni vetë çka po them: ¹⁶ Gota e bekimit, të cilën ne e bekojmë, a nuk është bashkim me Gjakun e Krishtit? Po edhe buka të cilën ne e ndajmë, a nuk është bashkim me Trupin e Krishtit? ¹⁷ Pasi është një bukë e vetme, ne, edhe pse shumë, jemi një trup i vetëm: pse të gjithë jemi pjesëtarë të një buke. ¹⁸

Shikoni Izraelin thjesht si popull: ata që hanë nga flitë a thua nuk janë pjesëmarrës të lterit? ¹⁹

Çka, pra, dua të them: se flia kushtuar idhullit është diçka? Ose idhulli është diçka? ²⁰ Mu të kundërtën! Porse [paganët] u flijojnë djajve e jo Hyjit; e unë nuk dua të bëheni pjesëtarë të djajve. ²¹ Nuk dua ta pini gotën e Zotit dhe gotën e djajve. Nuk mund të jeni pjesëtarë të tryezës së Hyjit dhe të tryezës së djajve. ²² A mos mendojmë ta nxisim xhelozinë e Zotit? A mos jemi më të zotët se Ai?

Gjithçka për nderin e Hyjit

²³ “Gjithçka është e lejueshme!”

“Por gjithçka nuk ka hije!”

“Gjithçka është e lejueshme!”

“Por gjithçka nuk ndërton!” ²⁴ Askush të mos e kërkojë interesin e vet, por interesin e tjetrit. ²⁵ Gjithçka shitet në treg, hajeni lirisht pa bërë pyetje për sa i përket ndërgjegjes, ²⁶ ‘Sepse e Zotit është toka dhe gjithçka është në të.’

²⁷ Po ndodhi e ju thirri ndonjë i pafe dhe ju pranoni të shkoni, hani çka t’ju vihet para duke mos pyetur gjë sa për arsye të ndërgjegjes. ²⁸ Nëse ndokush ju thotë: “Është mish i flijuar idhujve!” ‑ mos e hani për arsye të atij që ju përkujtoi dhe të ndërgjegjes ²⁹ ‑ të ndërgjegjes, e kam fjalën, të atij që të përkujtoi e jo të ndërgjegjes sate. E njëmend, pse ta gjykojë lirinë time ndërgjegjja e huaj? ³⁰ Në qoftë se unë marr pjesë me falënderim, përse të prozhmohem për atë gjë, për të cilën falënderoj?

³¹ Pra, në qoftë se hani, në qoftë se pini, në qoftë se edhe çkado tjetër bëni, bëni gjithçka në lavdi të Hyjit. ³² Mos jini, veç, rast shkandulli as për hebrenj, as për grekë, as për Kishën e Hyjit, ³³ sikurse edhe vetë mundohem t’u pëlqej të gjithëve pa kërkuar dobinë time, por dobinë e të gjithëve, që të mund të shëlbohen.

Kapitujt