Kapitujt

1 e Korintasve: 7. Çështje lidhur me martesën

¹ Tani lidhur me çka më keni shkruar.

Është mirë për njeriun të mos e prekë gruan. ² Megjithatë, për arsye të rrezikut të fëlligështisë, secili le ta ketë gruan e vet dhe çdo grua le ta ketë burrin e vet. ³

Burri le ta kryejë detyrën martesore ndaj gruas, po ashtu edhe gruaja ndaj burrit. ⁴ Gruaja nuk është pronarja e trupit të vet, por burri. Gjithashtu as burri nuk është pronari i trupit të vet, por gruaja. ⁵ Mos ia mohoni njëri‑tjetrit detyrën martesore, përveç me marrëveshje e përkohësisht që t’i kushtoheni lutjes e bashkohuni përsëri që djalli të mos ketë rast t’ju tundojë për shkak të papërmbajtjes suaj. ⁶ Këtë gjë jua them si lejim e jo si urdhër. ⁷

Kisha dashur që të gjithë njerëzit të ishin si unë; porse, secili e ka prej Hyjit dhuratën e vet të veçantë ‑ njëri kështu e tjetri ashtu.

⁸ Të pamartuarve dhe vejushave u them se është mirë për ta nëse qëndrojnë si unë. ⁹ Por, nëse nuk janë të zotët të përmbahen, le të martohen ‑ sepse më mirë është të martohen se të digjen.

¹⁰ Të martuarve u urdhëroj, jo unë, por Zotëria, që gruaja të mos ndahet prej burrit ¹¹ ‑ por, po ndodhi që të ndahet, të mos martohet më ose të pajtohet me burrin ‑ e burri të mos e lërë gruan.

¹² Të tjerëve u them unë, e jo Zoti: në qoftë se ndonjë vëlla e ka gruan të pafe dhe ajo pranon të jetojë me të, të mos e lërë. ¹³ Po ashtu edhe gruaja që e ka burrin të pafe dhe ai pranon të jetojë me të, të mos e lërë burrin. ¹⁴ Sepse burri i pafe shenjtërohet prej gruas dhe gruaja e pafe shenjtërohet prej burrit të krishterë. Përndryshe, fëmijët tuaj do të ishin të papastër, kurse kështu ‑ janë shenjtër. ¹⁵ Po qe se pala jo e krishterë do të ndahet, le të ndahet; i krishteri dhe e krishtera në raste të tilla nuk janë të lidhur: sepse Hyji na thirri në paqe. ¹⁶ Vërtet, çka di ti, o grua, se do ta shëlbosh burrin? E nga e di ti, o burrë, se do ta shëlbosh gruan?

Gjendja e jetës si ta ketë caktuar Zoti

¹⁷ Sa për të tjerat, secili të jetojë ashtu si ia ka dhënë Zoti, ashtu si ka qenë kur Hyji e thirri. Kështu caktoj në të gjitha kishat. ¹⁸ A u thirr ndokush si i rrethprerë? Mos të mundohet ta ndreqë rrethprerjen! Një tjetër ishte i parrethprerë? Mos të rrethpritet! ¹⁹ Nuk është asgjë rrethprerja dhe nuk është asgjë parrethprerja ‑ vlen vetëm zbatimi i urdhërimeve të Hyjit. ²⁰ Secili le të rrijë në atë gjendje në të cilën ishte kur u thirr. ²¹ Ishe ti skllav kur u ktheve në fe? Mos u prish, por, edhe nëse mund të bëhesh i lirë, më mirë përfito prej gjendjes sate. ²² Sepse, ai që u thirr si skllav, është i liruari i Zotit. Po ashtu edhe ai që u thirr si i lirë, është skllav i Krishtit. ²³ Krishti e ka paguar shpërblimin tuaj: mos u bëni skllevër të njerëzve! ²⁴ Secili, o vëllezër, le të qëndrojë në Hyjin në atë gjendje, në të cilën ishte kur u kthye në fe.

Virgjëria dhe vejëria

²⁵ Lidhur me virgjërat nuk kam farë urdhri prej Zotit, por jap këshillë si një njeri që, në saje të mëshirës së Zotit, meriton t’i besohet. ²⁶ Pra, mendimi im është se kjo gjendje është e mirë ‑ për shkak të ngushticës së tanishme, mendoj se është mirë për njeriun që të qëndrojë ashtu. ²⁷ Je i lidhur me grua? Mos kërko ndarje! Je i lirë nga gruaja? Mos kërko grua! ²⁸ Po edhe nëse martohesh, nuk bën mëkat. Po edhe virgjëra, nëse martohet, nuk bën mëkat, por të tillët do të kenë vuajtje në trup, e unë dëshiroj t’ju kursej.

²⁹ Ja, ç’dua të them, o vëllezër: koha është e shkurtër. Që tani edhe ata që i kanë gratë, të jenë si të mos i kishin, ³⁰ ata që qajnë, sikurse të mos qanin; ata që gëzohen, sikurse të mos kishin gëzim; ata që blejnë, sikurse të mos kishin gjë të vetën; ³¹ ata që e gëzojnë këtë botë, sikurse të mos e gëzonin, sepse trajta e kësaj bote po kalon. ³² E dëshira ime është që të mos keni kokëçarje. I pamartuari kujdeset për punët e Zotit: si t’i pëlqejë Zotit. ³³ Përkundrazi, i martuari kujdeset për punët e shekullit, si t’i pëlqejë gruas ³⁴ dhe është i ndarë. Po edhe gruaja e pamartuar dhe virgjëresha kujdeset për punët e Zotit, që të jetë e shenjtë [e] me trup e me shpirt; kurse e martuara kujdeset për punët e shekullit: si t’i pëlqejë burrit. ³⁵ Këto po jua them për të mirën tuaj, jo për t’ju vënë ndonjë lak, por që të jetoni në mënyrën më të përshtatshme ‑ krejtësisht të përqendruar në shërbimin e Zotit.

³⁶ Në qoftë se ndokush e sheh veten se nuk mund të qëndrojë i ndershëm kundrejt së fejuarës së vet, e ajo e ka arritur pjekurinë, dhe i duhet të jetë me të, le të bëjë çka ka menduar, nuk mëkaton: le të martohen. ³⁷ Por ai që ka marrë në zemër të vet vendim të qëndrueshëm e nuk ka nevojë dhe zotëron me vullnetin e vet e në zemrën e vet e merr vendimin të ketë nderim kundrejt të fejuarës së vet, bën mirë. ³⁸ Kështu, pra, ai që martohet me të fejuarën e vet bën mirë ‑ ai që nuk martohet, bën edhe më mirë.

³⁹ Gruaja është e lidhur derisa ta ketë burrin gjallë, po i vdiq burri, është e lirë: le të martohet me kë të dëshirojë ‑ veçse me të krishterë. ⁴⁰ Do të ishte veç, më e lumtur ‑ ky është mendimi im ‑ nëse do të qëndronte ashtu si është. Mendoj se edhe unë e kam Shpirtin e Hyjit.

Kapitujt