Kapitujt

Amosi: 9. Vegimi i pestë: rrënimi i Shenjtërores

9

¹ E pashë Zotin:

mbi lter rrinte e tha:

“Godite majën e shtyllës,

pragjet le të dridhen;

thërmojua të gjithëve kokat,

n’shpatë do ta pres atë që do të të shpëtojë!

Asnjë prej tyre s’do t’ia dalë të ikë,

kurrnjë prej tyre s’do të shpëtojë!

² Në depërtofshin edhe në fund të ferrit,

prej andej do t’i nxjerrë dora ime!

Po edhe në qiell në qoftë se ngjiten,

prej andej do t’i plandos!

³ E në u fshehshin në majën e Karmelit,

do t’i gjej e do t’i kap;

e nëse prej syve të mi do të fshihen

në fund të detit,

do t’i urdhëroj Gjarprit

atje t’i hajë!

⁴ Nëse në skllavëri shkojnë para armiqve të vet,

do t’i urdhëroj shpatës t’i presë,

sytë e mi nuk do t’ua ndaj

jo për të mirë, por për të keqe të tyre.”

Këngë lavdi

⁵ Edhe Zoti Hyji i Ushtrive...

E prek tokën e ajo lëkundet,

e gjithë gjindja mbulohet në zi;

toka ngrihet mbarë porsi lumi,

bie porsi lumi i Egjiptit.

⁶ Ndenjësen e vet në qiell e ndërton,

si kupë qiellin e vë mbi tokë,

u urdhëron ujërave të detit

e i shpërndan mbi sipërfaqe të tokës,

‑ Zot Ai emrin e ka!

S’ka tagër të veçantë Izraeli

⁷ “Pse a s’jeni për mua, bij të Izraelit,

porsi bijtë e etiopasve?”,

‑ thotë Zoti!

Pse, a s’bëra të dalë Izraeli

nga dheu i Egjiptit,

porsi filistenjtë nga Kaftori

dhe syrianët nga dheu Cir?

⁸ Ja, sytë e Zotit Hyj

janë të drejtuar mbi mbretërinë e mëkatit!

Do ta zhdukë prej faqes së dheut.

Do të sharrojnë vetëm mëkatarët

“Megjithatë, s’do ta zhdukë

shtëpinë e Jakobit krejtësisht

‑ është fjala e Zotit.

⁹ Ja, pra, unë do të urdhëroj

të tundet, mes kombesh, Izraeli,

sikur gruri tundet në shoshë,

një guralec për tokë nuk bie.

¹⁰ Prej shpatës do të bien

të gjithë mëkatarët e pop’llit tim,

të gjithë që thonë: “E keqja s’do të na afrohet,

s’do të bjerë mbi ne!”

IV. PERSPEKTIVË RIPËRTËRITJEJE E FRYTSHMËRI PARAJSORE

¹¹ “ Po atë ditë,

do ta ngre kasollën e Davidit

që u rrëzua,

do t’i ndreq plasjet e saj,

e çka u rrëzua në të, do ta ndërtoj,

do ta ndreq si në ditë të dikurshme,

¹² me qëllim që të pushtojnë

tepricën e Edomit

dhe të gjitha kombet

mbi të cilat u thirr emri im

‑ thotë Zoti që i zbaton këto. ‑

¹³ Ja, po vijnë ditët,

‑ thotë Zoti,

kur lavërtari do ta zërë korrtarin

e shtrydhësi i rrushit farëhedhësin:

musht do të pikojnë malet

e do të rrjedhin të gjitha kodrat!

¹⁴ Do t’i kthej të treturit në skllavëri

të popullit tim Izraelit;

do t’i rindërtojnë qytetet e rrënuara

e në to do të banojnë,

do të mbëltojnë vreshta

e do ta pijnë verën e tyre,

do të punojnë kopshtet

e do t’i hanë prodhimet e tyre.

¹⁵ Do t’i ngulit në truallin e tyre,

e s’do të shpërngulen më

nga toka e tyre

që ua dhurova!”,

‑ është fjala e Zoti

Kapitujt