Kapitujt

Amosi: 3. Zgjedhje e ndëshkime

¹ Dëgjojeni këtë fjalë që Zoti e tha në

lidhje me ju, bijtë e Izraelit, dhe në lidhje me të gjitha vëllazëritë, që i nxora nga dheu i Egjiptit. Thotë:

² “Vetëm juve ju zgjodha

nga të gjitha fiset e tokës,

prandaj do t’ju ndëshkoj

për të gjitha fajësitë tuaja.

S’mund t’i qëndrohet thirrjes profetike

³ A udhëtojnë, vallë, dy vetë së bashku

po qe se nuk bien në përkim?

⁴ Vallë, ulërin në pyll luani

po qe se pre nuk ka?

Lëshon zë luanthi në strofull

në qoftë se zënë nuk ka asgjë?

⁵ A thua bie shpendi në tokë

në qoftë se hedhur s’i është laku?

A thua shkrehet nga toka kurthi

para se të ketë zënë ndonjë gjë?

⁶ Bie boria, vallë, në qytet

e populli nuk kushtrimohet?

Fatkeqësi thua vjen në qytet

që shkaktuar të mos jetë prej Zotit?

⁷ Zoti Hyj në të vërtetë gjë s’bën

pa ua pasur zbuluar synimin

shërbëtorëve të vet, profetëve.

⁸ Ulërin luani,

kush nuk trembet?

Foli Zoti Perëndi:

kush të mos profetizojë?

Samaria e prishur do të mbarojë

⁹ Lajmëroni në pallate të Asyrisë

e në pallate të dheut të Egjiptit;

thoni: ‘Mblidhuni në male të Samarisë!’

Vëreni ç’pshtjellime janë në të,

sa të dhunuar në gjirin e saj!

¹⁰ Nuk dinë të veprojnë me drejtësi

‑ thotë Zoti,

grumbullojnë në pallate të veta

dhunë rrëmbime!”

¹¹ Prandaj kështu thotë Zoti Hyj:

“Armiku do të rrethojë vendin;

do të thyhet fuqia jote,

pre do të bëhen pallatet e tua!”

¹² Kështu thotë Zoti:

“Si i nxjerr bariu nga goja e luanit

dy kërcinj o një copë veshi,

kështu do të shpëtojnë bijtë e Izraelit

që banojnë në Samari

në kënd të shtratit

e në shtrojë të Damaskut.”

Kundër Betelit e godinave të bukura

¹³ “Dëgjoni e dëshmoni shtëpisë së Jakobit

‑ thotë Zoti, Hyji i Ushtrive ‑

¹⁴ “Ditën kur unë t’i ndëshkoj

keqbërjet e Izraelit,

do të ndëshkoj atë e lterët e Betelit,

do të këputen brirët e lterit,

për tokë do të bien.

¹⁵ Do ta rrënoj shtëpinë e dimërimit

bashkë me shtëpinë e verimit,

do të shemben shtëpitë e fildishta,

do të zhduken shtëpitë e mëdha!”,

‑ është fjala e Zotit.

Kundër grave të Samarisë

Kapitujt