Kapitujt

Sofonia: 1. Ngjarje kozmike

1

¹ Fjala e Zotit që i qe drejtuar Sofonisë, birit të Kusit, birit të Godolisë, birit të Amarisë, birit të Ezekisë, në ditët e Jozisë, birit të Amonit, mbretit të Judës.

I. DITA E ZOTIT NË JUDE

Ngjarje kozmike

² “Gjë pa shqimur nuk do të lë

përmbi faqen e dheut ‑

thotë Zoti.

³ Do të shfarosë njeri e kafshë,

do t’i zhduk shpendët e qiellit

e peshqit e detit,

do t’i shkallmoj të patenzonët

farën njerëzve do t’ua tres mbi tokë,

‑ thotë Zoti.

Kundër nderimit të hyjnive të huaja

⁴ Kundër Judës do ta ngre dorën

e mbi të gjithë banorët e Jerusalemit,

do t’i zhduk nga vendi tepricat e Baalit,

emrin e rojtarëve e të priftërinjve të tij

⁵ edhe ata që mbi pullaze adhurojnë

ushtritë qiellore,

ata që adhurojnë e në Zotin përbetohen,

por që përbehen edhe në Melkolmin,

⁶ ata që s’e ndjekin Zotin,

që me Zotin nuk këshillohen

e që atë nuk e kërkojnë.

⁷ Heshtni para Zotit Hyj,

sepse është afër Dita e Zotit!

Gati e bëri Zoti një therore

e i shenjtëroi të grishurit e vet!

Kundër të mëdhenjve të oborrit

mbretëror

⁸ Do të ndodhë Ditën e flijimit të Zotit:

Do t’i ndëshkoj princat,

bijtë e mbretërve

e të gjithë ata që vishen

me petka të huajsh,

⁹ do t’i ndëshkoj të gjithë ata

që me krenari e kapërcejnë pragun,

që e mbushin shtëpinë e zotërisë së vet

me fajësi e me dredhi.

Kundër tregtarëve të Jerusalemit

¹⁰ Po atë ditë ‑ është fjala e Zotit ‑

do të shpërthejë klithma nga Dera e Peshkut

edhe britma nga Qyteti i Ri

e nga Kodrat një poterë e madhe!

¹¹ Ulëritni, banorët e Shterës,

se sharroi mbarë populli i Kanaanit,

mbaruan me argjend të ngarkuarit!

Kundër atyre që nuk besojnë

¹² Po atë ditë

me kandil do ta kërkoj Jerusalemin

e do t’i ndëshkoj njerëzit

që shtrihen mbi draun e vet

e u thotë mendja:

‘Zotynë nuk është në gjendje

të bëjë mirë as të bëj keq!’

¹³ Pasuria do t’u rrëmbehet,

shtëpitë e tyre do të rrënohen.

Ata shtëpi do të ndërtojnë,

porse në to nuk do të banojnë,

ata vreshta do të mbëltojnë,

porse verën s’do t’ua pinë!

Dita e Zotit

¹⁴ U afrua Dita e madhe e Zotit,

afër është, me hapa të shpejtë po vjen!

I hidhur është zëri i Ditës së Zotit:

në të i forti ngushtë do të jetë!

¹⁵ Ditë hidhërimi ajo ditë,

ditë travaji e ngushtice!

Ditë shkretimi e shkatërrimi,

ditë errësire edhe terri!

Ditë mjegulle e thellimi!

¹⁶ Ditë borie e kushtrimi,

kundër qyteteve qyteza,

kundër pirgjeve të larta në kënde!

¹⁷ Në ngushticë të madhe do t’i vërë njerëzit,

do të ecin si të ishin të verbër

kundër Zotit pse mëkatuan!

Gjaku i tyre do të derdhet si pluhur,

porsi plehu rropullitë e tyre!

¹⁸ Nuk do të mundet t’i shpëtojë

ari as argjendi i tyre.

Ditën e zem’rimit të Zotit

me zjarrin e zellit të tij

do të shkatërrohet toka mbarë.

Me nxitim do t’i shfarosë

të gjithë ata që e banojnë tokën!

Kapitujt