Kapitujt

Sofonia: 3. Kundër drejtuesve të kombit

3

¹ Vaj për ty, qytet kryengritës,

i papastër e i dhunshëm!

² S’e dëgjoi thirrjen,

s’pranoi qortimin!

Në Zotin nuk pati besim,

Hyjit të vet nuk iu afrua!

³ Mes tij princat e tij

luanë ulëritës;

gjykatësit bishë shkretëtire

që asht s’ruajnë për mëngjes!

⁴ Profetët e tij fjalëmëdhenj,

njerëz rrenacakë!

Priftërinjtë e tij dhunojnë Shenjtëroren,

dhunë i bëjnë Ligjit!

⁵ Në mes të tij i drejtë është Zoti,

s’bën paudhësi;

çdo mëngjes e dëfton të drejtën,

porsi dritën që kurrë s’mungon.

Por i paudhi s’di ç’është turpi!

Mësimi i kombeve

⁶ “I shkallmova popujt,

i rrënova pirgjet e tyre,

i shkretova udhët e tyre:

askush nëpër to s’kalon!

Ua shova të gjitha qytetet,

kështu që s’mbeti asnjë banues!

⁷ Mendova: Tani do të më duash,

do të ma pranosh mësimin!

S’do të zhduken prej syve të tyre

ndëshkimet që unë ua solla!

Por jo! Shpejtuan t’i prishin

të gjitha veprimet e veta!

⁸ Prandaj, më prit ku je!

‑ është fjala e Zotit ‑

ditën kur të ngrihem paditës,

sepse vendosa të bashkoj popujt

tok t’i mbledh mbretëritë,

që ta zbraz mbi ta zemërimin,

tërë hidhërimin e zemërimit tim:

në flakadanin e zellit tim

do të përpihet toka mbarë!”

IV. PREMTIMET

Kthimi i popujve paganë

⁹ Atëherë popujve do t’ua bëj

buzët e pastërta,

që të gjithë të thërrasin emrin e Zotit

e krahakrahas t’i shërbejnë!

¹⁰ Prej përtej lumenjve të Etiopisë,

që prej andej të devotëshmit e mi,

bijtë e të treturve të mi,

dhuratë do të më sjellin!

Teprica e përvuajtur e Izraelit

¹¹ “Po atë ditë turp më s’do të kesh

për asgjë që ke vepruar

duke u ngritur kundër meje,

sepse atëherë prej teje do të largoj

fjalëmëdhenjtë, krenarët e tu,

e s’do të vazhdosh më të krenohesh

përmbi Malin tim të shenjtë!

¹² Do të bëj në mjedisin tënd të qëndrojë

populli i përvuajtur e i varfër!

Në emër të Zotit do të kërkojë strehim

Teprica e Izraelit.

¹³ Paudhësi nuk do të bëjnë më,

rrena më nuk do të thonë,

në gojë të tyre s’do të gjendet më

gjuhë gënjyese!

Por do të kullosin e do të mrizojnë

pa pasur kush t’i shqetësojë!”

Psalme gëzimi për Sionin

¹⁴ Këndo hareshëm, bija e Sionit,

thuaja gëzueshëm këngës, o Izrael!

Gëzo e galdo me gjithë zemër,

ti, bija e Jerusalemit!

¹⁵ E tërhoq Zoti dënimin tënd,

i shpërndau larg armiqtë e tu.

Mbret i Izraelit është Zoti mes teje,

s’ke pse më ta druash të keqen!

¹⁶ Jerusalemit atë ditë do t’i thuhet:

“Frikë aspak mos ki, Sion,

assesi të mos mpaken duart!

¹⁷ Në mesin tënd është Zoti Hyji yt,

trim mbi trima Shpëtimtar!

Do të galdojë për ty hareshëm,

i përmalluar nga dashuria,

do të kërcejë për ty me gëzim

¹⁸ porsi në ditë feste.”

Kthimi i të shpërngulurve

“Do ta tres prej teje fatkeqësinë

që kurrë më të mos jesh poshtëruar.

¹⁹ Ja, unë vetë do t’ua tres farën

të gjithë atyre që të kanë përndjekur.

Në atë kohë do ta shpëtoj çalamanin,

do ta sjell të humburën.

Do t’u jap nder e emër të madh

në çdo vend ku qenë poshtëruar.

²⁰ Po në atë kohë unë do t’ju kthej,

po në atë kohë do t’ju bashkoj,

do t’ju jap zë të madh e nder

në sy të mbarë popujve të tokës,

kur ta kryej ripërtëritjen tuaj

‑ thotë Zoti ‑ po në sytë tuaj!”

Kapitujt