Kapitujt

Amosi: 4. Zoti Hyj u përbetua

4

¹ Dëgjojeni këtë fjalë,

o ju lopët e Basanit,

që jeni në mal të Samarisë,

që të ligshtët i shtypni,

që i mundoni varfanjakët,

që u thoni burrave tuaj:

‘Na sill të pimë!’

² Zoti Hyj u përbetua

në shenjtërinë e vet:

“Ja, dita juve ju erdhi,

kur do t’ju ngulin në heshtë

e pasardhësit tuaj me fuzhnjën,

³ njëra pas tjetrës do të dilni

n’për biruca

e do të flakeni në Armon!”,

është fjala e Zotit.

Iluzionet e Izraelit, mospendimi e ndëshkimi

⁴ “Shkoni në Betel e mëkatoni,

në Galgalë e mëkatoni më shumë!

Në mëngjes herët kushtoni flitë,

krye tri ditësh të dhjetat tuaja!

⁵ Flinë e lavdit kushtojeni me brumë,

shpallni kushte vullnetare botërisht,

pse kështu ju ka ëndje, bij të Izraelit!”

‑ është fjala e Zotit Hyj!

⁶ “E, pra, dhëmbë për dhëmbë vetë ju lashë

në të gjitha qytetet tuaja,

e pa bukë në të gjithë fshatrat tuaj,

megjithatë tek unë s’u kthyet!”,

‑ thotë Zoti !

⁷ “Tre muaj para korrjes

shi s’ju çova;

lashë të bjerë shi në një qytet,

por jo në tjetrin:

njëra pjesë lagej me shi,

kurse tjetra, pse shi s’i çova,

bëhej shkrumb!

⁸ Dy ‑ tri qytete atëherë

vraponin në një qytet

për të pirë ujë,

por s’mund të ngiheshin;

megjithatë tek unë s’u kthyet!”,

‑ është fjala e Zotit.

⁹ “Ju godita me erë përcëlluese e me

kllogjër;

begatinë e kopshteve e të vreshtave,

të fiqve e të ullishtave tuaja

e hëngri vemja,

por ju tek unë s’u kthyet!”,

‑ është fjala e Zotit.

¹⁰ “Kundër jush çova murtajën,

si dikur kundër Egjiptit;

të rinjtë tuaj me shpatë i preva,

kuajt tuaj bëheshin pre.

Hundët jua zura

me qelbësirën e fushimit tuaj,

por ju tek unë s’u kthyet!”,

‑ është fjala e Zotit.

¹¹ “Ju shpartallova

sikur Hyji i shpartalloi

Sodomën e Gomorrën

e u bëtë

porsi cungu i nxjerrë nga zjarri,

por ju tek unë s’u kthyet!”,

‑ është fjala e Zotit.

¹² “Prandaj, kështu do të sillem me ty, Izrael!

Pasi kështu duhet të të bëj ty,

bëhu gati, o Izrael,

t’i dalësh përballë Hyjit tënd!”

Këngë lavdi

¹³ Sepse ja:

Ai që trajtën u jep maleve,

Ai që erërat i krijon,

që njeriut ia zbulon synimet,

që krijon agim e terr,

që ecën mbi lartësitë e tokës

e ka Emrin

Zoti Hyji i Ushtrive!

Kapitujt