Kapitujt

Romakëve: 15. T’i plotësojmë jo dëshirat tona, por ato të të tjerëve

¹ Ne që jemi të fortë e kemi për detyrë t’i mbartim të metat e të ligshtëve e jo të kërkojmë çka neve na pëlqen. ² Secili prej nesh të mundohet t’i pëlqejë të afërmit të vet, për të mirën e tij, që të përparojë në fe, ³ sepse as Krishti nuk kërkoi t’i pëlqejë vetvetes, por, siç është në Shkrimin e shenjtë:

‘Sharjet e atyre që të shanin ty, ranë mbi mua.’

⁴ Tashti, gjithçka që dikur u shkrua, u shkrua për mësimin tonë, në mënyrë që, me anë të qëndresës e të ngushëllimit që vjen nga Shkrimi i shenjtë, të kemi shpresë. ⁵ E Hyji që jep qëndresën dhe ngushëllimin, bëftë që ju të jeni plotësisht në përkim me njëri-tjetrin siç dëshiron Jezu Krishti, ⁶ në mënyrë që, një mendimi e një goje, ta lëvdoni Hyjin, Atin e Zotit tonë, Jezu Krishtit.

Ungjilli si për hebrenj ashtu për grekë

⁷ Prandaj, pranojeni njëri‑tjetrin në shoqëri sikurse Krishti ju pranoi ju për lavdinë e Hyjit. ⁸ Pohoj se Krishti u shërbeu të rrethprerëve për arsye të besnikërisë së Hyjit, për t’i plotësuar premtimet e dhëna etërve ⁹ e që paganët ta lavdërojnë Hyjin për mëshirën e tij, siç thotë Shkrimi i shenjtë:

‘Prandaj do të të lavdëroj ndër paganë

dhe do t’i këndoj këngë Emrit tënd!’

¹⁰ Edhe përsëri thuhet:

‘Brohoritni, popuj paganë, bashkë me e tij!’

¹¹ E prapë:

‘Lëvdojeni Zotin, mbarë popujt paganë!

E lavdërofshin të gjitha kombet!’

¹² Përsëri Isaia thotë:

‘Do të shfaqet Pinjolli i Jeseut

i ngritur për të sunduar paganët;

në Të paganët do të shpresojnë.’

¹³ Dhe Hyji, në të cilin e kemi shpresën, ju mbushtë me çdo gëzim e paqe në besimin tuaj që, në saje të fuqisë së Shpirtit Shenjt, kurrë të mos ju mungojë shpresa!

Shërbesa misionare e Palit

¹⁴ E sa për ju, vëllezërit e mi, jam plotësisht i bindur se edhe ju vetë jeni plot mirësi, plot me çdo dije, të aftë për të këshilluar njëri‑tjetrin. ¹⁵ Megjithatë, ju shkrova pjesërisht pak si më guximshëm, për t’jua përkujtuar gjërat pak a shumë të njohura. E bëra këtë në saje të hirit që më është dhënë prej Hyjit ‑ ¹⁶ për të qenë mbarështues i Krishtit Jezus ndër paganë, meshtar i Ungjillit të Hyjit, që paganët, të shenjtëruar prej Shpirtit Shenjt, të bëhen kusht i pëlqyeshëm Hyjit.

¹⁷ Kam, pra, pse të mburrem në Jezu Krishtin për veprën që kryej për Hyjin. ¹⁸ Sepse, nuk do të guxoja të përmend asgjë tjetër, përveç sa Krishti bëri nëpër mua për kthimin e paganëve në dëgjesë me anë të fjalës e të veprës, ¹⁹ me fuqi të shenjave e të mrekullive dhe me fuqi të Shpirtit Shenjt. Kështu, që prejJerusalemit e për qark në Iliri e kam përhapur Ungjillin e Krishtit ²⁰ e madje u përpoqa ta shpall, jo atje ku ishte i njohur Emri i Krishtit ‑ që të mos ndërtoja mbi themelet e tjerëve ‑ ²¹ por, siç është në Shkrimin e shenjtë:

‘Do ta shohin ata, ndër të cilët nuk qe kumtuar,

do ta kuptojnë ata, të cilët për të nuk kanë dëgjuar.’

Plani i Palit për të vizituar Romën

²² Kjo gjë edhe më së shumti më pengoi të vij te ju. ²³ Tani veç, pasi nuk më ka mbetur fushatë veprimi në këto anë e, tash sa vjet kam dëshiruar së tepërmi të vij te ju ²⁴ kur të nisem për Spanjë... Shpresoj, pra, se në udhëtim për atje, do t’ju shoh dhe se ju do të më përcillni me çka më lypet për atje, pasi një herë, sado pak, të kënaqem në praninë tuaj.

²⁵ Tani veç, po shkoj për Jerusalem, për t’ju sjellë ndonjë shërbim shenjtërve, ²⁶ sepse Maqedonia dhe Akaja vendosën t’u dërgojnë një ndihmë shenjtërve të varfër të Jerusalemit. ²⁷ Po, vetë deshën, por e kanë edhe për detyrë, sepse, pasi paganët u bënë pjesëtarë të të mirave shpirtërore të tyre, janë të detyruar t’i ndihmojnë me të mira materiale.

²⁸ Pasi ta kem kryer këtë punë ‑ t’ua kemi dorëzuar zyrtarisht këtë dhuratë ‑ do të nisem për Spanjë e, në kalim, për te ju. ²⁹ E di se kur të vij te ju, do të vij plot me bekime të Krishtit.

³⁰ Ju përbej [vëllezër] me Jezu Krishtin, Zotin tonë, e me dashurinë e Shpirtit Shenjt, luftoni bashkë me mua me lutjet që për mua ia drejtoni Hyjit: ³¹ të më shpëtojë prej të pafeve të Judesë dhe që ndihma ima që po e çoj në Jerusalem t’u pëlqejë shenjtërve; ³² kështu që, në dashtë Perëndia, të vij te ju plot hare e të pushoj bashkë me ju.

³³ Hyji, burimi i paqes, qoftë me ju të gjithë. Amen.

Kapitujt