Kapitujt

Mikea: 7. Padrejtësi e gjithmbarshme

7

Vaj për mua se jam bërë

si kallëzmbledhësi përmbas korrjes,

si kokrrambledhësi pas vjeljes së vreshtit!

S’gjej një vile për ta ngrënë,

as fik të lashtë që e dëshiroj!

² Njeriu i mirë, u zhduk nga vendi,

njeri të drejtë më ndër njerëz s’ka!

Të gjithë vënë prita gjak për të derdhur,

vëllai vëllanë me rrjetë e gjuan!

³ Për të bërë keq duart i kanë gati:

princi kërkesat i shton,

gjykon gjykatësi sipas dhuratës,

vetë shkruan e vetë vulos i madhi:

vaj për ta që e shtrembërojnë të drejtën!

⁴ Më i miri ndër ta është ferrë,

më i drejti si ferrëkuqja.

Erdhi dita e rojeve të tua,

ndëshkimi yt:

tani është poshtërimi i tyre!

Mos kini në mikun besim,

në të afërmin shpresë mos kini;

para asaj që të fle në gji

ruaju se e hap gojën!

⁶ Sepse biri të atin e shan,

bija çohet kundër s’ëmës,

reja çohet kundër vjehrrit:

armiqtë e njeriut

shtëpiakët e tij!

⁷ Kurse unë sytë i drejtoj te Zoti,

shpresoj në Hyjin Shëlbuesin tim;

Hyji im do të ma dëgjojë lutjen!

IV. SHPRESAT

Sioni nën të sharat e armikes

Mos m’u kënaq, armikja ime,

pse jam rrëzuar, prapë do të çohem,

ndërsa ende rri në errësirë,

Zoti është drita ime!

⁹ Do ta duroj zem’rimin e Zotit

sepse kam mëkatuar kundër tij

deri të gjykojë çështjen time

e të më japë të drejtën.

E di se do të më nxjerrë në dritë,

do ta shoh drejtësinë e tij!

¹⁰ Kur të më shohë armikja ime,

turpi atë do ta mbulojë,

atë që për mua thotë:

‘Ku është Zoti Hyji yt?’

Sytë e mi do të kënaqen në të.

Sepse ajo do të shqelmohet

si shqelmohet balta rrugës!

Profeci për ripërtëritje

¹¹ Po vijnë ditët

të rindërtohen muret e tua;

kufijtë e tu atë ditë do të zgjerohen!

¹² Po atë ditë te ti do të vijnë

prej Asyrisë deri në Egjipt,

prej Egjiptit deri në Lumë,

prej detit e deri në det,

prej malit e deri në mal!

¹³ Toka në shkretëtirë do të kthehet

për shkak të banorëve të vet,

si rrjedhojë e veprave të tyre.

Lutja kundër popujve

¹⁴ Kullote popullin tënd nën kërrabën tënde,

grigjën e trashëgimit tënd,

banorët e vetmuar pyjeve,

në mes të kopshteve.

Kullotshin Basan e Galaad

si dikur!

¹⁵ Porsi në ditët e daljes sate nga Egjipti,

na dëfto vepra të mrekullueshme!

¹⁶ Do të shohin popujt

e do të mbesin të turpëruar

sa të pushtetshme që të jenë,

gojës së vet do t’ia vënë dorën,

veshët do t’u shurdhojnë.

¹⁷ Do të lëpijnë pluhurin porsi gjarpri,

porsi zvarranikët e tokës.

Duke u dridhur do të dalin nga shtëpitë e veta

‑ drejt Zotit Hyjit tonë ‑

do të të druajnë e prej teje do të tremben.

Lutje e thekshme për falje

¹⁸ Cili Hyj është porsi ti

që shlyen fajin,

që fal mëkatin

Tepricës së trashëgimit tënd,

që hidhërim s’mban për gjithmonë

pse kënaqet kur mund të përdëllejë?!

¹⁹ Do të kthehet, do të na përdëllejë,

fajësitë tona do t’i shkelë,

do t’i flakë në fund të detit

të gjitha mëkatet tona.

²⁰ Do t’ia dhurosh besën Jakobit

e Abrahamit hirin tënd

si iu përbetove etërve tanë

që prej ditëve moti të kaluara!

Kapitujt