Kapitujt

Mikea: 6. Zoti gjykon popullin e vet

¹ Dëgjoni se çfarë thotë Zoti:

“Në këmbë! Mbrohu në gjyq përpara Maleve

edhe Kodrat le të ta dëgjojnë zërin!”

² Dëgjojeni, Male, gjykimin e Zotit,

vini vesh, themelet e tokës,

sepse Zoti me popull të vet po gjykohet,

Izraelin Ai po e padit:

³ “Çka të kam bërë, populli im?

E me çka ty ta mërzita?

M’u përgjigj!

⁴ Të nxora nga dheu i Egjiptit,

të shpëtova prej shtëpisë së skllavërisë,

para teje çova Moisiun,

Aronin edhe Marinë!

⁵ Populli im, të të bjerë në mend, të lutem,

ç’synoi Balaku, mbreti i Moabit?

Ç’gjegje i dha Balaam Beori?

Nga Setimi deri në Galgalë

për t’i njohur veprat e drejta të Zotit.”

⁶ “Çka kam të denjë t’i kushtoj Zotit

kur bie në gjunj para të Tejetlartit Hyj?

T’i kushtoj, vallë, fli shkrumbimi

ose viça që e mbushën vitin?

⁷ A thua Zotit do t’i pëlqejnë?

mijëra deshë

e përrenj vaji me miliarda?

T’i kushtoj, thua, të parëlindurin

si shpërblim për fajin tim,

frytin e kraharorit tim

për mëkat që bëra?”

⁸ “T’është dëftuar ç’është e mirë, o njeri,

e çka Zoti kërkon prej teje:

s’kërkon tjetër pos të zbatosh drejtësinë,

të duash mirësinë,

të jetosh kujdesshëm me Hyjin tënd!”

Kundër mashtruesve në qytet

Zëri i Zotit përhapet qytetit

‑ është urti të druhet emri yt ‑ :

“Dëgjoni, fis e kuvendi i qytetit!

¹⁰ A mund ta duroj batin e rremë,

efin e zvogëluar, të mallkuarin?

¹¹ Mund t’i shfajësoj peshoret e rreme,

qeset e peshave mashtruese?

¹² Plot paudhësi janë të pasurit e qytetit,

sa herë flasin, banorët e tij rrejnë

gjuhë gënjeshtare kanë në gojën e tyre.

¹³ Prandaj zura të të godas,

të të shkretoj për mëkate të tua!

¹⁴ Do të hash, por nuk do të ngihesh,

gjendja jote e mjerë në ty do të mbesë.

Do të ndash mbanash mënjanë, por s’do të shpëtosh gjë,

po edhe nëse do të shpëtosh gjë,

do t’ia fal shpatës.

¹⁵ Do të mbjellësh e s’do të korrësh,

do të shtrydhësh ullinj e me vaj s’do të lyhesh,

do të shtrydhësh rrush e verë s’do pish.

Shembulli i Samarisë

¹⁶ I mban urdhërat e Omriut,

të gjitha veprat e shtëpisë së Akabit,

sillesh sipas parimeve të tyre

që unë të bëj në ty një emnesë,

banorët e tu shenjë përqeshjeje:

do ta mbartni poshtërimin e popujve.”

Kapitujt