Kapitujt

Mikea: 4. Mbretëria e ardhshme e Zotit në Sion

4

E do të ndodhë në kohë ‑ që do të vijnë:

Mali i Shtëpisë së Zotit

do të ngallitë mbi majë të maleve,

do të lartësohet përmbi kodra!

Atëherë tek ai do të ngarendin popujt,

² do të shkojnë me nxitim shumë popuj

e do të thonë: “Ejani

të ngjitemi në Malin e Zotit,

në Shtëpinë e Hyjit të Jakobit,

për të na i mësuar udhët e veta

që t’i ndjekim shtigjet e tij!”

Sepse Ligji vjen nga Sioni,

fjala e Zotit nga Jerusalemi.

Ai do të gjykojë ndërmjet shumë popujve,

do t’i shqyrtojë popujt e fuqishëm

deri në vendet më të largëta.

Shpatat e veta do t’i kthejnë në palla,

në drapërinj heshtat e veta.

Një popull kundër tjetrit shpatën s’do ta nxjerrë,

s’do ta mësojnë më mjeshtrinë e luftimit!

⁴ Secili do të pushojë nën hardhinë e vet,

nën hijen e fikut të vet:

askush nuk do t’u shtjerë më frikë,

sepse kështu ka thënë goja e Zotit të Ushtrive.

⁵ Sepse të gjithë popujt ecin,

secili në emër të zotit të vet,

kurse ne ecim në emër të Zotit,

Hyjit tonë tani e përgjithmonë e jetës!

Mbledhja në Sion e grigjës së shpërndarë

“Po atë ditë ‑ është fjala e Zotit ‑

do t’u bashkoj çalamanët,

edhe atë që e dëbova, do ta sjell,

po edhe atë që e ndëshkova.

⁷ Me grigjë tani të çalë do të përftoj Tepricën,

popull të fortë me atë që hoq aq keq!”

Përmbi ta do të sundojë Zoti në Malin Sion

tani e përgjithmonë e jetës!

E ti, o Kulla e Grigjës,

ti, Kodra e Bijës së Sionit,

te ti do të vijë, do të arrijë

pavarësia e dikurshme,

mbretëria e bi’së së Jerusalemit.

Rrethimi, mërgimi e çlirimi i Sionit

Përse tani lëshon klithma të mëdha?

Pse, a mbret në ty nuk ka,

a mbaroi këshilltari yt,

që të pushtoi dhembja

si dhembjet e lindëses?

¹⁰ Vuaj e mundohu porsi ajo që lind,

Bija e Sionit,

se të duhet ta lëshosh qytetin

e të qëndrosh në fushë të larë,

duhet të shkosh në Babilon!

Atje do të fitosh çlirimin,

atje Zoti do të të shpërblejë

prej dorës së armiqve të tu.

Popujt e fshirë në lëmë

E tani, shumë kombe

janë bashkuar kundër teje.

Ato thonë: “Të përdhunohet,

mbi Sionin të kënaqet syri ynë!”

¹² Por ata s’janë në gjendje të njohin

sendërgjimet e Tenzot,

s’e kuptuan këshillin e tij

se i bashkoi si duaj në lëmë!

¹³ Çohu e shij, Bija e Sionit,

brirët e tu do t’i bëj të hekurt,

thundrat e tua prej tumbakut:

do të shtypësh popuj të panumërt!

Prenë e tyre do t’ia kushtosh Zotit,

kamjen e tyre Zotit të mbarë tokës!

Poshtërim e lavdi e dinastisë së Davidit

Tani gërvishtu, o bija e vragës!

Sepse të ngujuar jemi në rrethim;

me thupër mollëzën godisin

të gjykatësit të Izraelit.

Kapitujt