Kapitujt

Abdia: 1. Dënimi kundër Edomit

1

Vegimi i Abdisë.

Hyrja

Kështu i thotë Zoti Hyj Edomit.

E kemi dëgjuar një lajm prej Zotit

dhe një kasnec ka qenë dërguar ndër kombe:

“Çohuni! Të sulemi kundër tij!

Në luftë!”

Dënimi kundër Edomit

² Ja, të vogël po të bëj ndër popuj,

je tepër i përbuzshëm!

³ T’i mori mendtë krenaria e zemrës sate,

o banues, ndër plasa qetash,

që banon në maja të lartë

e të thotë mendja:

“Kush do të mund të më plandosë përtokë!”

⁴ Të lartësoheshe edhe si shqiponja,

të ta bëje çerdhen mu ndër yje,

do të t’plandosja edhe prej andej, ”

‑ është fjala e Zotit!

Asgjësimi i Edomit

⁵ Nëse do të hynin cubat në ty

ose ata që vjedhin natën

‑ si do të sharroje!

A s’do të vidhnin sa u mjafton?

Nëse vjelësit në ty do të hynin,

a do të të linin gjë përveç ndonjë greci?

⁶ E po si e kërkuan Ezaun?

Skutëliq s’lanë pa ia gjetur!

⁷ Të dëbuan deri në skaj,

besëlidhësit e tu të rrejtën,

të mbizotëruan miqtë e tu,

ata që me ty bukë hanë

do ta vënë pritën!

Jo, në të mençuri s’ka!

⁸ “Pse a njëmend thua se atë ditë

‑ është fjala e Zotit ‑

s’do t’i tresë të urtët e Edomit,

urtinë prej malit të Ezaut?

⁹ Do të tmerrohen ushtarët e tu, Teman,

do të shfaroset çdo njeri

prej malit të Ezaut.”

Gabimi i Edomit

¹⁰ “Për vrasjen e për dhunën

kundër vëllait tënd Jakobit,

do të t’mbulojë turpi,

e fara do të shuhet përgjithmonë!

¹¹ Ti qëndroje përballë atë ditë,

kur të huajt rob ushtrinë ia merrnin,

kur barbarët ia thyenin dyert,

mbi Jerusalem kur hidhnin short,

edhe ti ishe si një ndër ta.”

¹² Mos iu kënaq çmoskurrjes së vëllait tënd,

mos iu gëzo ditës së vështirësisë së tij!

Mos u kënaq mbi bijtë e Judës

ditën e rrënimit të tyre!

Mos e hap vesh e më vesh gojën

në ditë të ngushticës!

¹³ Mos ia thyej popullit tim derën

ditën e rrënimit të tij,

mos ia shiko me kënaqje të keqen,

ditën e shkretimit të tij!

Mos vër dorë mbi kamje të tij,

ditën e emnesës së tij!

¹⁴ As ndër shtigje mos u vër pritë

për t’i vrarë ata që ikin!

Mos tradhto ata që shp’tuan

ditën e ngushticës së tyre!

¹⁵ Sepse afër është dita e Zotit,

kundër popujve të gjithë!

Sikur bëre edhe ty do të të bëhet,

hakmarrja jote mbi kokë do të të bjerë!

Ditën e Zotit Izraeli do të hakmerret mbi Edomin

¹⁶ Sikur pitë mbi malin tim të shenjtë,

të gjithë popujt vazhdimisht do të pijnë,

do të pijnë e do të shpikin:

do të jenë sikur të mos kishin qenë kurrë!

¹⁷ Shpëtimi do të jetë mbi mal të Sionit

‑ i shenjtë do të jetë ‑

shtëpia e Jakobit do t’i pronësojë

ata që e pronësuan atë.

¹⁸ Zjarr do të jetë shtëpia e Jakobit,

e Jozefit flakë do të jetë,

kurse shtëpia e Esaut kashtë!

Do ta djegin, shkrumb do ta bëjnë,

kush s’do të mbesë prej shtëpisë së Ezaut,

sepse Zoti kështu e ka thënë!

Izraeli i ri

¹⁹ Do ta pushtojnë jugun,

malin e Ezaut,

e Sefelami filistenjtë;

do të pronësojnë krahinën e Efraimit

edhe krahinën e Samarisë,

Beniamini do të pronësojë Galaadin.

²⁰ Mërgimtarët e parë të bijve të Izraelit,

do të pronësojnë

dheun e kananenjve deri në Sareptë;

mërgimtarët e Jerusalemit

që janë në Safarad,

do të pronësojnë qytetet e jugut.

²¹ Ngadhnjimtarë do të ngjiten në malin Sion

për të sunduar malin e Ezaut,

atëherë Zoti do të mbretërojë!

Kapitujt