Kapitujt

Romakëve: 16. Përshëndetje personale

¹ Po jua porosis Febën, motrën tonë [e] që është diakonesha e kishës së Kenhreut. ² Pranojeni në Zotin si u ka hije shenjtërve dhe ndihmojeni në gjithçka të ketë nevojë për ju, sepse edhe ajo ka qenë mbrojtëse për shumëkënd si dhe për mua.

³Përshëndetni Priskën e Akuilën, bashkëpunëtorët e mi në Jezu Krishtin, ⁴ të cilët, për të ma shpëtuar jetën e kanë vënë kokën e vet në gërshërë. I falënderoj, jo vetëm unë, por edhe të gjitha kishat e paganëve. ⁵ Përshëndeteni kishën që bashkohet në shtëpinë e tyre.

Përshëndeteni edhe Epenetin, të dashurin tim, frytin e parë të Azisë për Krishtin. ⁶ Të fala edhe Marisë, që aq fort është munduar për ju. ⁷ Të fala edhe Andronikut e Junies, kushërinjve të mi dhe shokëve të burgut; ata janë të përmendur ndër apostuj dhe kanë qenë para meje të Krishtit. ⁸ Të fala Ampliatit, të dashurit tim në Zotin. ⁹ Të fala edhe Urbanit, bashkëpunëtorit tonë në Krishtin, po edhe Stakës, të dashurit tim. ¹⁰ Të fala edhe Apelit, të provuarit në Krishtin. Të fala edhe Aristobulajve. ¹¹ Të fala edhe Herodionit, kushëririt tim. Të fala edhe Narcisajve, që janë në Zotin. ¹² Përshëndetni edhe Trifenën dhe Trifozën, të cilat veprojnë për Zotin. Të fala edhe Persidës së dashur, e cila ka vuajtur shumë për Zotin. ¹³ Të fala edhe Rufit, të zgjedhurit në Zotin, edhe nënës së tij dhe simes. ¹⁴ Të fala edhe Asinkritit, Flegontit, Ermes, Patrobit, Ermanit dhe vëllezërve që janë me ta. ¹⁵ Të fala edhe Filologut dhe Julisë, Nereut e motrës së tij e Olimpës dhe të gjithë shenjtërve që janë me ta. ¹⁶ Përshëndeteni njëri‑tjetrin me të puthur të shenjtë. Ju përshëndesin të gjitha kishat e Krishtit.

¹⁷ Ju lutem, o vëllezër, të ruheni prej atyre që shkaktojnë përçarje dhe shkanduj në dëm të mësimit në të cilin jeni mësuar: rrini larg tyre! ¹⁸ Sepse të tillët nuk i shërbejnë Krishtit, por barkut të vet dhe, me fjalë të bukura e të ëmbla, gënjejnë zemrat e njerëzve të thjeshtë. ¹⁹ Zëri i dëgjesës suaj ka arritur gjithkund. Sa për ju, pra, jam shumë i gëzuar e dëshiroj të jeni të urtë për sa i përket së mirës e të jeni të pastër nga çdo e keqe. ²⁰ Hyji, autori i paqes, do ta dërrmojë për së shpejti djallin nën këmbët tuaja.

Hiri i Jezusit, Zotit tonë, qoftë me ju!

²¹ Ju përshëndet Timoteu, bashkëpunëtori im, edhe Luci, Jasoni dhe Sosipatri, kushërinjtë e mi.

²² Ju përshëndes në Zotin edhe unë Terci, që e shkrova këtë letër.

²³ Ju bën të fala Gaji, mikpritësi im dhe i mbarë kishës. Të fala ju bën Erasti, arkëtari i qytetit edhe vëllai Kuarti. ^[24]

Doksologjia ‑ Lavdia Hyjit

²⁵ Atij që mund t’ju forcojë ‑

sipas Ungjillit tim dhe predikimit të Jezu Krishtit,

sipas zbulesës së Misterit,

të mbajtur fshehur për kohë të amshuara,

²⁶ por tani të shfaqur dhe, me anë të

shkrimeve të profetëve,

me urdhër të Hyjit të amshuar,

të lajmëruar mbarë popujve paganë

për t’i sjellë në dëgjesën e fesë ‑

²⁷ Një të vetmit Hyj, të Gjithëdijshmit,

i qoftë, nëpër Jezu Krishtin, lavdi

në shekuj të shekujve. Amen.

Kapitujt