Kapitujt

Romakëve: 12. Jeta e re në Krishtin

¹ Po ju përbej me mëshirën e Hyjit, o vëllezër, ta kushtoni trupin tuaj fli të gjallë, të shenjtë e të pëlqyeshme Hyjit ‑ porsi kultin tuaj shpirtëror. ² Mos iu përshtatni parimeve të shekullit, por shndërrojeni e ripërtëriteni mendjen tuaj, në mënyrë që ta dalloni vullnetin e Hyjit: çka është e mirë, çka i pëlqen Atij, çka është e përsosur.

³ Në emër të hirit që më është dhënë i them secilit prej jush: mos e çmoni veten më tepër se duhet ta çmoni, por vlerësojeni veten me vlerësim të drejtë, secili sipas masës së fesë që ia dhuroi Hyji. ⁴ Sepse, sikurse në një trup kemi shumë gjymtyrë dhe të gjitha gjymtyrët nuk e kanë të njëjtin funksion, ⁵ kështu edhe ne, edhe pse shumë, jemi një trup i vetëm në Krishtin e, secili prej nesh, gjymtyrë e njeri‑tjetrit. ⁶ Kemi dhurata të ndryshme sipas hirit që na u dha:

Në qoftë dhurata e profecisë

‑ le të ushtrohet në përkim me fenë;

⁷ në qoftë dhurata e shërbimit

‑ le të jetë në shërbim;

në qoftë dhurata e dhënies së mësimeve

‑ le të japë mësime;

⁸ në qoftë dhurata e këshillit

‑ le të këshillojë;

kush ndan

‑ le të jetë bujar;

kush është i parë

‑ le të jetë i kujdesshëm;

kush bën vepra mëshire

‑ le t’i bëjë me gëzim!

Sjelljet e jetës së krishterë

⁹ Dashuria le të jetë e çiltër. Ikuni me urrejtje veprave të këqija e ndiqni veprat e mira! ¹⁰ Duajeni njëri‑tjetrin me dashuri vëllazërore! Prijini njëri‑tjetrit duke nderuar shokun më parë e më tepër! ¹¹ Në kujdesin ndaj të tjerëve të jeni të shpejtë, në shpirt të nxehtë; Zotit shërbejini! ¹² Në shpresë jini të gëzueshëm, në vështirësi të durueshëm, në lutje të qëndrueshëm! ¹³ Ndihmoni të krishterët që kanë nevojë, ushtroni mikpritjen!

¹⁴ Bekojini salvuesit tuaj! Bekojini e mos i mallkoni! ¹⁵ Gëzohuni me ata që gëzojnë, qani me ata që qajnë! ¹⁶ Jini në përkim me njëri‑tjetrin! Mos dëshironi nderime të larta, përkundrazi t’ju tërheqin ato të përvuajturat! Mos ia mbushni mendjen vetes se jeni të urtë! ¹⁷ Askujt mos ia ktheni të keqen me të keqe! Kini kujdes të bëni mirë para të gjithë njerëzve! ¹⁸ Nëse është e mundur ‑ aq sa varet prej jush ‑ jini në paqe me të gjithë njerëzit!

¹⁹ Mos u hakmerrni, o të dashur, po lini vend të veprojë hidhërimi i Hyjit, sepse është në Shkrimin e shenjtë: ‘Mua më përket hakmarrja, unë do të hakmerrem, ’ thotë Zoti. ²⁰ Ti përkundrazi:

‘Nëse armiku yt është i uritur, jepi të hajë,

nëse është i etur, jepi të pijë!

Po bëre kështu,

gaca të ndezura do të grumbullosh mbi kokën e tij!’

²¹ Mos lejo të të mundë e keqja, por ngadhënje mbi të keqen me vepra të mira!

Kapitujt