Kapitujt

Romakëve: 10. Shëlbimi për të gjithë njerëzit

¹ Vëllezër! Dëshira e zemrës sime dhe lutja që ia drejtoj Hyjit është: që të shëlbohen. ² Për të vërtetë, unë dëshmoj për ta: kanë zell për Hyjin, por mjerisht, jo në kuptimin e vërtetë, ³ sepse, duke mos e pranuar drejtësinë që vjen prej Hyjit e duke kërkuar të vendosin të vetën, nuk iu bindën drejtësisë së Hyjit. ⁴ Sepse, ai që i dha fund Ligjit të Moisiut është Krishti ‑ për shenjtërimin e secilit që beson.

Shëlbimi për të gjithë njerëzit

⁵ Vërtet, Moisiu shkruan për drejtësinë që vjen nga Ligji: ‘Njeriu që e zbaton do të jetojë në saje të tij.’ ⁶ Kurse drejtësia që vjen nga feja thotë kështu: ‘Mos thuaj në zemrën tënde: Kush do të ngrihet në qiell? ‑ d. m. th. për të bërë që të zbresë Krishti; ⁷ as: Kush do të zbresë në Nëntokë? ‑ d. m. th. për të bërë që Krishti të ngrihet prej të vdekurish. ⁸ E çka thotë, pra?

‘Afër e ke fjalën,

në gojën tënde dhe në zemrën tënde.’

d. m. th. fjalën e fesë që ne predikojmë.

⁹ Sepse, në qoftë se me gojë e dëshmon se Jezusi është Zot dhe në qoftë se në zemrën tënde e beson se Hyji e ka ngjallur prej të vdekurish, do të shëlbohesh. ¹⁰ Pra, për të fituar drejtësinë duhet të besosh në zemër e për të fituar shëlbimin duhet ta dëshmosh fenë me gojë. ¹¹ Sepse, Shkrimi i shenjtë thotë: ‘Kush beson në Të nuk do të turpërohet.’

¹² Kështu, pra, nuk ka dallim mes hebreut e grekut: të gjithë kanë vetëm një Zot, të pasur kundrejt atyre që e thërrasin në ndihmë. ¹³ Sepse: ‘Kushdo ta thërrasë Emrin e Zotit, do të shëlbohet.’

¹⁴ Por, si do ta thërrasin Atë, në të cilin nuk besuan? E si do të besojnë në Atë, për të cilin nuk dëgjuan? Si do të dëgjojnë, nëse ndokush nuk ua predikon? ¹⁵ E si do ta predikojnë pa qenë dërguar? Kështu është në Shkrimin e shenjtë:

‘Sa të bukura janë këmbët

e atyre që sjellin sihariq!’

¹⁶ Por të gjithë nuk iu bindën Ungjillit. Sepse Isaia thotë:

‘O Zot, e kush i besoi predikimit tonë?’

¹⁷ Kështu, pra, besimi vjen nga predikimi, e predikimi është shpallja e Fjalës së Zotit.

¹⁸ Atëherë pyes: A nuk dëgjuan?

Po si jo! ‘Zëri i tyre mori mbarë dheun, e fjalët e tyre arritën deri në skajet e botës.’

¹⁹ Prapë pyes: A thua Izraeli nuk e kuptoi?

I pari tha Moisiu:

‘Unë do t’ju bëj smirëzezë me anë të një populli që s’është farë Populli,

do t’u ngacmoj me anë të një populli të marrë.’

²⁰ Pastaj Isaia guxon të thotë edhe më tepër:

‘Më gjetën ata që nuk më kërkuan,

u jam dëftuar atyre që nuk më pyetnin.’

²¹ E këto fjalë ia drejton Izraelit:

‘Gjithë ditën i shtriva duart e mia drejt Popullit që nuk dëgjon por kundërshton.’

Kapitujt