Kapitujt

Hebrenjve: 4. Jezusi Kryeprifti i madh

¹ Prandaj, le të trembemi se, deri sa mbetet premtimi të hyhet në Pushimin e tij, të mos vërtetohet për ndonjërin prej jush se ka vonuar. ² Sepse edhe ne e kemi marrë lajmin e mirë sikurse edhe ata, por atyre nuk u vlejti gjë fjala që dëgjuan sepse nuk u bashkuan me fe me ata që e pranuan fjalën. ³ Në Pushim veç, në të vërtetë hyjmë ne që besuam sipas fjalës që ka thënë:

»Kështu, u përbetova në zemërimin tim:

kurrë s’do të hyjnë në Pushimin tim«.

Ndonëse veprat i kishin marrë fund që në krijimin e botës. ⁴ E njëmend ka thënë diku për të shtatën ditë kështu: »Dhe Hyji pushoi nga të gjitha veprat e veta të shtatën ditë«. ⁵ E këtu prapë: »Kurrë s’do të hyjnë në Pushimin tim«.

⁶ Mbetet, pra, se disa do të hyjnë në të dhe, pasi ata që të parët e morën lajmin e gëzueshëm, nuk hynë për shkak të padëgjesës, ⁷ Ai cakton rishtas një ditë - një »Sot« - duke thënë pas sa kohe me gojë të Davidit, siç u tha më parë:

»Sot, në qoftë se e dëgjoni zërin e tij,

mos jini zemërgurë«.

⁸ Vërtet, po t’i kishte futur Jozuehi në Pushim, Hyji nuk do të kishte folur pastaj për një ditë tjetër. ⁹ Këndej, mbetet një pushim i të shtunës për e Hyjit. ¹⁰ Sepse, kush hyri në pushimin e tij, edhe ai pushoi nga veprat e veta, sikurse edhe Hyji prej veprave të tij.

¹¹ Të vrapojmë, pra, për të hyrë në atë Pushim, që asnjë të mos mbarojë pas shembullit të të njëjtës padëgjesë!

¹² Vërtet, fjala e Hyjit është e gjallë dhe vepruese. Është më e mprehtë se çdo shpatë dy tehesh. Përshkon aq sa ndan frymën dhe shpirtin, gjymtyrët dhe palcin, edhe shqyrton ndjenjat dhe dëshirat e zemrës. ¹³ Nuk ka krijesë të fshehur para saj. Gjithçka është cullak e zhveshur para syve të Atij, të cilit do t’i japim llogari.

Jezusi Kryeprifti i madh

¹⁴ Prandaj, pasi e kemi Kryepriftin e Madh, Jezusin, Birin e Hyjit, i cili i ka përshkuar qiejt - të jemi të palëkundshëm në dëshmimin e fesë! ¹⁵ Sepse, nuk kemi Kryeprift që nuk mund të ketë dhimbje për dobësitë tona, pasi ai vetë i ka sprovuar të gjitha si ne, me përjashtim vetëm të mëkatit.

¹⁶ T’i afrohemi, prandaj, plot guxim fronit të hirit, që të fitojmë mëshirë dhe të gjejmë hir për të pasur ndihmë në kohë të duhur.

Kapitujt