Kapitujt

Hebrenjve: 1. Biri më i pushtetshëm se engjëjt

¹ Pasi Hyji herë pas here dhe në mënyra të ndryshme, në të kaluarën, u ka folur etërve me anë të profetëve, ² së fundi, në këto ditë, na foli edhe neve me anë të Birit, të cilin e bëri trashëgimtarin e të gjitha gjërave, nëpër të cilin edhe e krijoi gjithësinë. ³ Biri, që është pasqyrimi i Lavdisë dhe vula e qenies së Hyjit, që me të fuqishmen fjalën e vet mban gjithësinë, pasi e kreu pastrimin e mëkateve, ndenji në të djathtën e Madhërisë në qiell; ⁴ u bë aq më i pushtetshëm se engjëjt sa më të madhërueshëm se ata e trashëgoi Emrin!

Biri më i pushtetshëm se engjëjt

⁵ Dhe vërtet, cilit prej engjëjve Hyji i tha ndonjëherë:

»Ti je im Bir

unë sot të linda?«

Dhe prapë:

»Unë do t’i jem Atë

dhe ai do të më jetë Bir?«

⁶ Dhe prapë, kur dërgon të Njëlindurin Birin e vet në botë, thotë:

»Le ta adhurojnë të gjithë engjëjt e Hyjit!«

⁷ Kurse për engjëjt Ai thotë kështu:

»Ai i bën engjëjt e vet erëra,

shërbëtorët e vet flakë zjarri«.

⁸ Ndërsa për Birin thotë:

»Froni yt, o Hyj, në shekuj të shekujve, dhe skeptër drejtësie - skeptri i Mbretërisë sate.

⁹ E ke dashur drejtësinë dhe e ke urryer padrejtësinë:

prandaj, o Hyj, Hyji yt të shuguroi me bagmin e gëzimit si asnjë ndër shokët e tu«.

¹⁰ Edhe:

»Ti, o Zot, në fillim e krijove tokën edhe qiejt janë vepër e duarve të tua. ¹¹ Ata do të zhduken kurse ti qëndron, të gjithë do të vjetrohen si petku: ¹² porsi petk do t’i mbështjellësh - porsi mantel - dhe do të ndërrohen. Ti vetëm i vetmi mbetesh i njëjtë - vitet e tua nuk kanë mbarim«.

¹³ Po e për cilin ndër engjëj tha ndonjëherë:

»Më rri në të djathtën time

derisa t’i vë armiqtë e tu

shtrojë të këmbëve të tua?!«

¹⁴ A nuk janë, thua, të gjithë engjëjt shpirtra të ngarkuar me ndonjë shërbim, të dërguar për t’u shërbyer atyre që do ta trashëgojnë shëlbimin?

Kapitujt