Kapitujt

Galatasve: 6. Mbartni barrën e njëri tjetrit

¹ Vëllezër, nëse ndokush bie në faj, ju që jeni njerëz shpirtërorë, forcojeni të tillin me shpirt butësie. Ruaje veten që edhe ti të mos biesh në tundim.

² Mbartjani njëri‑tjetrit barrën e kështu do ta plotësoni Ligjin e Krishtit.

³ Sepse, po mendoi ndokush se është diçka ‑ e nuk është asgjë ‑ ai gënjen vetveten. ⁴ Secili le ta shqyrtojë vetë veprën e vet e atëherë, po gjeti arsye mburrjeje, le të jetë në krahasim me vetveten ‑ e jo me të tjerët. ⁵ Sepse, secili do ta mbartë barrën e vet.

⁶ Kush merr mësim në Fjalën e Hyjit prej ndokujt, le ta bëjë mësuesin e vet pjesëtar në të gjitha të mirat e veta.

⁷ Mos u gënjeni: Hyji nuk lejon të vihet në lojë! Atë që njeriu mbjell, atë edhe do të korrë! ⁸ Kush mbjell në trup të vet, nga trupi do të korrë shkatërrimin, e kush mbjell në Shpirt, nga Shpirti do të korrë jetën e pasosur.

⁹ Mos të lodhemi kurrë duke bërë mirë; për të vërtetë, nëse nuk do të mejmë, patjetër në kohën e duhur, do të korrim. ¹⁰ Prandaj, derisa të kemi kohë, t’i bëjmë mirë gjithkujt, sidomos vëllezërve në fe.

Qortimet e fundit dhe bekimi

¹¹ Shikoni se me ç’germa të mëdha po ju shkruaj me dorën time! ¹² Të gjithë ata që duan të mbahen të rëndësishëm sipas parimeve të mishit e të gjakut, të tillët ju shtyjnë të rrethpriteni me qëllim që të mos jenë të salvuar për shkak të kryqit të Krishtit. ¹³ E pra, as vetë të rrethprerët nuk e mbajnë Ligjin, por duan që ju të rrethpriteni, që të mund të mburren me trupin tuaj. ¹⁴ Sa për mua, mos e thashtë Zoti të mburrem me tjetër gjë, përveçse me kryqin e Zotit tonë Jezu Krishtit, nëpër të cilin për mua bota është e kryqëzuar dhe unë për botën. ¹⁵ Sepse s’vlen asgjë as rrethprerja as parrethprerja ‑ por krijesa e re. ¹⁶ Të gjithë ata që do ta mbajnë këtë rregull si edhe mbarë Izraeli i Hyjit, paçin paqe e mëshirë!

¹⁷ Që tani askush më të mos më trazojë, sepse unë mbart në trupin tim shenjat e Jezusit.

¹⁸ Hiri i Zotit tonë Jezu Krishtit qoftë me shpirtin tuaj, o vëllezër! Amen.

Kapitujt