Kapitujt

Efesianëve: 6. Fëmijët e prindërit

¹ Fëmijë, dëgjojini prindërit tuaj në Zotin, sepse është e drejtë. ² “Ndero babain tënd dhe nënën” ‑ është urdhri i parë me premtim: ³ ”që të jesh mirë e të jetosh gjatë mbi dhe!”

⁴ Ju, o prindër, mos i hidhëroni fëmijët tuaj, por edukojini me disiplinë e me këshilla që vijnë prej Zotit.

Skllevërit dhe zotërinjtë

⁵ Skllevër, dëgjojini zotërinjtë tuaj tokësorë me nderim e bindje në thjeshtësinë e zemrës ‑ porsi Krishtin. ⁶ Jo për sy e faqe, si ata që duan t’u pëlqejnë njerëzve, por si skllevërit e Krishtit, të cilët me vetëdije e kryejnë vullnetin e Hyjit, ⁷ dhe me ëndje shërbejnë, porsi Zotit e jo njerëzve, ⁸ duke ditur se ai që bën mirë, qoftë skllav qoftë i lirë, për këtë do ta marrë pagën prej Zotit.

⁹ Por edhe ju, zotërinj, silluni edhe ju ashtu kundrejt tyre: larg jush mendimi t’i ndëshkoni! Dijeni se Zotëruesi i tyre dhe juaji është në qiell! Te Ai nuk ka krahambajtje!

Luftojeni të keqen

¹⁰ Kështu këndej forcohuni në Zotin dhe në fuqinë e pakufishme të tij! ¹¹ Ngjeshuni me armët e Hyjit që të mund t’u bëni ballë pritave të djallit. ¹² Sepse, nuk kemi luftë vetëm kundër njeriut, por kundër principatave, kundër pushteteve, kundër sunduesve të kësaj bote të errët, kundër shpirtrave të këqij të hapësirës qiellore. ¹³ Prandaj ngjeshni të gjitha armët e Hyjit që të mund të qëndroni përballë në ditën e ligë e, pasi të ngadhënjeni mbi të gjitha, të qëndroni zotërues të fushës. ¹⁴

Në këmbë, pra! Ngjeshni ijët me të vërtetën dhe veshni drejtësinë në vend të pancirës, ¹⁵ mbathni këmbët me zellin e kumtimit të Ungjillit të paqes! ¹⁶ Në çdo gjë mbani në dorë shqytin e fesë: me të do të mund t’i fikni shigjetat e zjarrta të të Keqit! ¹⁷ Merrni përkrenaren e shëlbimit dhe shpatën e Shpirtit Shenjt, d. m. th. Fjalën e Hyjit!

¹⁸ Lutuni në bashkim me Shpirtin Shenjt me çdo uratë e lutje në çdo rast! Prandaj edhe rrini zgjuar me shumë qendresë dhe në lutje për të gjithë shenjtërit. ¹⁹ Lutuni edhe për mua, që Hyji të ma zhdërvjellë gjuhën dhe të më japë fjalë të përshtatshme për ta kumtuar plot guxim misterin e Ungjillit, ²⁰ i dërguari i të cilit jam në pranga, që të mund të flas me guximin e duhur.

Përshëndetjet e fundit

²¹ Dhe që ju të dini si jam dhe çka bëj, për çdo gjë do t’ju vërë në dijeni Tihiku, vëllai i dashur dhe ndihmësi besnik në Zotin. ²² Atë po e dërgoj te ju pikërisht për këtë punë që të dini si jemi dhe që t’i ngushëllojë zemrat tuaja.

²³ Hyji Atë dhe Zotëria Jezu Krisht u dhënçin të gjithë vëllezërve paqe, dashuri bashkë me fenë!

²⁴ Paçin hir të gjithë ata që e duan Jezu Krishtin, Zotërinë tonë me dashuri që nuk mbaron.

Kapitujt