Kapitujt

Filipianëve: 4. Qortime

¹ Prandaj, vëllezërit e mi të dashur që aq fort ju kam për zemër, gëzimi dhe kurora ime, kështu pra, ‑ qëndroni të fortë në Zotin.

Qortime

² E porosis Evodinë dhe e përbetoj Sintikën të jetojnë në përkim me Zotin. ³ Po të lutem edhe ty, Shok i dashur, ndihmoju sepse ato luftuan bashkë me mua për Ungjill, së bashku me Klementin dhe me bashkëpunëtorët e mi, emrat e të cilëve gjenden në “librin e jetës”.

⁴ Gëzohuni gjithmonë në Zotin, rishtas po ju them: gëzohuni! ⁵ Mirësinë tuaj le ta njohin të gjithë njerëzit! Zoti është afër! ⁶ Për asgjë mos u shqetësoni, por gjithçka ‑ me lutje dhe me lutja të përcjella me falënderim ‑ paraqitjani Hyjit nevojat tuaja! ⁷ Dhe paqja e Hyjit, që është më e vlefshme se mund ta mendojmë, do t’i ruajë zemrat tuaja dhe mendimet tuaja në Krishtin Jezus.

⁸ Së fundi, o vëllezër, mundohuni të keni për zemër gjithçka është e vërtetë, gjithçka është e ndershme, gjithçka është e drejtë, gjithçka është e pastër, gjithçka është e shenjtë, gjithçka është e denjë për dashuri, gjithçka është e denjë për lavdi, gjithçka është virtyt. ⁹ Çka keni mësuar, çka keni marrë, çka keni dëgjuar dhe parë në mua ‑ atë bëni ‑ dhe Hyji që jep paqen do të jetë me ju.

Falënderim filipianëve për ndihmat

¹⁰ Jam tejet i gëzuar në Zotin, pse kujdesi juaj ndaj meje mundi së fundi të lulëzojë. Vërtet, ju edhe më parë keni menduar të kujdeseni për mua, por nuk keni pasur rast. ¹¹ Nuk po them kështu për arsye të s’kamjes, sepse ju e dini se unë jam mësuar të jem i kënaqur me aq sa kam.

¹² Di të jetoj në skamje

dhe di të jetoj në pasje.

Jam mësuar gjithsesi dhe për gjithçka:

të ngihem e të jem i uritur,

të kem mjaft e të kem pak!

¹³ Gjithçka mundem me ndihmën e Atij që më jep fuqi!

¹⁴ Por, prapëseprapë, është bukur për ju që morët pjesë në nevojën time.

¹⁵ Po edhe ju, o filipianë, e dini mirë se në fillim të predikimit të Ungjillit, kur u nisa prej Maqedonisë, asnjë kishë nuk më dha gjë lidhur me “të dala e të marra”, përveçse vetëm ju. ¹⁶ Madje edhe në Selanik kur isha në nevojë, më dërguat ndihma një herë e dy herë. ^l7 Jo, nuk kërkoj dhurata, por kërkoj fryt të begatshëm në dobinë tuaj.

¹⁸ Kam gjithçka më duhet, madje edhe për së tepërmi: jam plot me çdo të mirë që mora prej Epafroditit, çka ju më dërguat: “erë e mirë” ‑ fli e erëndshme që i pëlqen Hyjit. ¹⁹ Dhe Hyji im do të plotësojë çdo nevojë tuajën me begatinë e vet, për mrekulli, nëpër Jezu Krishtin. ²⁰ Hyjit, Atit tonë, i qoftë çdo lavdi në shekuj të shekujve. Amen.

Përshëndetjet e fundit

²¹ Përshëndetni çdo shenjt në Jezu Krishtin!

Vëllezërit që janë me mua ju bëjnë të fala. ²² Ju bëjnë të fala të gjithë shenjtërit, sidomos ata që janë të pallatit të perandorit.

²³ Hiri i Zotit tonë Jezu Krishtit qoftë me shpirtrat tuaj!

Kapitujt