Kapitujt

Filipianëve: 1. Uratët e Palit për filipianët

¹ Pali dhe Timoteu, shërbëtorët e Krishtit Jezus: të gjithë shenjtërve në Krishtin Jezus që janë në Filipe me mbikqyrës dhe me diakonë:

² paçi hir e paqe prej Hyjit, Atit tonë, dhe prej Jezu Krishtit Zot.

Uratët e Palit për filipianët

³ Gjithmonë, sa herë më bie ndër mend për ju, falënderoj Hyjin tim. ⁴ Gjithëherë e në çdo lutje që bëj, lutem me gëzim për ju të gjithë ⁵ për arsye të pjesëmarrjes tuaj në përhapjen e Ungjillit që prejditës së parë e deri tani. ⁶ Dhe jam plotësisht i bindur se Ai që në ju e filloi veprën e mirë, Ai edhe do ta kryejë deri në Ditën e Krishtit Jezus.

⁷ Dhe është e drejtë t’i kem këto ndjenja për ju! Për të vërtetë, unë ju mbaj në zemrën time, sepse ju të gjithë jeni pjesëtarët e hirit tim në prangat e mia, në mbrojtjen e në përforcimin e Ungjillit.

⁸ Po, Hyjin e kam dëshmitar se ju dua pa masë të gjithëve me dashurinë e Jezu Krishtit! ⁹ Dhe ja, për çka lutem: që dashuria juaj të shkojë duke u rritur përherë e më fort në njohuri e në kuptim të plotë, ¹⁰ që të mund të dalloni çka është më e mirë, që të jeni të pastër si dielli dhe pa farë të mete për Ditën e Krishtit, ¹¹ plot me fryt drejtësie që vjen nëpër Jezu Krishtin ‑ për lavdi e nder të Hyjit.

Krishti është jeta ime

¹² Dëshiroj, vëllezër, ta dini këtë gjë: të vështirat që më ndodhën ndihmuan shumë më tepër në përhapjen e Ungjillit, ¹³ sepse në mbarë pretoriumin e gjithkund gjetiu u mor vesh se gjendem në pranga për shkak të Krishtit, ¹⁴ dhe shumica e vëllezërve, e trimëruar në Krishtin për shkak të prangave të mia, gjithnjë e më tepër merr guxim ta shpallë pa frikë fjalën.

¹⁵ Njëmend disa e predikojnë Krishtin të shtyrë prej smirës e prej rivalitetit, por disa të tjerë prej qëllimit të mirë. ¹⁶ Këta veprojnë me dashuri. E dinë se unë gjendem këtu për arsye të mbrojtjes së Ungjillit, ¹⁷ kurse ata e shpallin Krishtin të shtyrë prej rivalitetit. Qëllimet e tyre nuk janë të pastërta: mendojnë se kështu do t’i bëjnë më të vështira prangat e mia. ¹⁸ Ani, çka ndodh? asgjë tjetër veçse predikohet Krishti, qoftë për qëllime të tjera, qoftë me çiltëri. Kësaj gjëje i gëzohem dhe do t’i gëzohem! ¹⁹ Sepse e di se në saje të lutjeve tuaja dhe të ndihmës së Shpirtit të Jezu Krishtit kjo do të më vlejë për shëlbim, ²⁰ sikurse pres me dëshirë të flaktë dhe shpresoj se nuk do të turpërohem për asgjë, porse me guximin tim të plotë ‑ si gjithmonë ashtu edhe tani ‑ Krishti do të madhërohet në trupin tim, si në jetofsha si në vdiqsha.

²¹ Vërtet, për mua Krishti është jetë dhe vdekja fitesë! ²² Por në qoftë se jeta në trup më mundëson një veprimtari frytdhënëse, çka atëherë të zgjedh? Nuk po di! ²³ Jam ndërdyshas: dëshiroj të shkoj e të jem me Krishtin, [sepse] kjo është gjë shumë, shumë më e mirë, ²⁴ por të jetoj në këtë trup është më e nevojshme për ju. ²⁵ Për tani e di se do të mbetem dhe do të rri në mesin tuaj për përparimin tuaj e në gëzim të fesë, ²⁶ që mburrja juaj për mua në Jezu Krishtin të shtohet, kur përsëri të vij ndër ju.

²⁷ Ju veç, jetoni në mënyrë të denjë të Ungjillit të Krishtit, që ‑ kur të vij e t’ju shoh, ose, larg prej jush ‑ kur të dëgjoj për ju, të ndiej se jeni të qëndrueshëm në një shpirt dhe se, një zemre, luftoni të gjithë së bashku për fenë e Ungjillit ²⁸ pa farë frike të armikut. Kjo gjë është shenja paralajmëruese e dënimit të tyre dhe e shëlbimit tuaj: dhe kjo vjen prej anës së Hyjit. ²⁹ Sepse juve Hyji ju dha hirin t’i shërbeni Krishtit jo vetëm duke besuar në Të, por edhe duke pësuar për Të, ³⁰ duke bërë po të njëjtën luftë që patë se bëra unë dhe që dëgjoni se e bëj edhe tani.

Kapitujt