Kapitujt

Efesianëve: 3. Misioni i Palit ndër paganë

¹ Për këtë arsye unë Pali, i burgosuri i Krishtit [Jezus] për ju paganët...

² Mendoj se patjetër do të keni marrë vesh për hirin që Hyji, për ta çuar në vend synimin e vet, ma ka dhënë për të mirën tuaj, ³ [se] me zbulesë qesh vënë në njohuri të Misterit, për të cilin shkurtimisht posa ju vura në dijeni. ⁴ Duke e lexuar mund ta kuptoni se si unë e marr vesh Misterin e Krishtit, ⁵ i cili nuk u qe zbuluar njerëzve të breznive të shkuara sikurse tani u është zbuluar në Shpirt Shenjt apostujve të tij të shenjtë dhe profetëve: ⁶ se paganët ‑ në Jezu Krishtin ‑ janë bashkëpjesëtarë të të njëjtit trashëgim, bashkëgjymtyrë të të njëjtit trup, dhe bashkanëtarë të të njëjtit premtim në saje të Ungjillit, ⁷ mbarështuesi i të cilit u bëra me anë të dhuratës së hirit të Hyjit që m’u dha me fuqinë mrekullisht vepruese të tijën.

⁸ Mua, më të voglit ndër të gjithë shenjtërit, m’u dha ky hir: t’ua shpall paganëve pasurinë e pashqyrtueshme të Krishtit, ⁹ e të bëj të dalë në dritë [para të gjithëve] si vihet në veprim Misteri i mbajtur fshehur që prej amshimit në mendjen e Hyjit, Krijuesit të rruzullimit, ¹⁰ që tani ‑ me anë të Kishës ‑ të njoftohen Principatat e Pushtetet në qiell lidhur me dijen e shumëllojshme të Hyjit ‑ ¹¹

të synuar që prejamshimit e të zbatuar nëpër Jezu Krishtin, Zotërinë tonë. ¹² Në të kemi, në saje të besimit në Të, lirinë t’ i afrohemi Hyjit me plot shpresë. ¹³ Prandaj po ju lutem të mos ju lëshojë zemra për shkak të vuajtjeve të mia që i pësoj për ju! Ato janë nder për ju!

Njohja e dashurisë së Hyjit

¹⁴ Për këtë arsye i përkul gjunjët e mi para Atit, ¹⁵ prej të Cilit merr emrin e vet çdo atësi në qiell e mbi tokë, ¹⁶ që të denjohet, në saje të begatisë së Lavdisë së vet, t’ju forcojë me anë të Shpirtit të vet në fuqi për të mirën e njeriut të brendshëm, ¹⁷ që Krishti të banojë në zemrat tuaja me anë të fesë në mënyrë që, të rrënjosur e të themeluar në dashuri, ¹⁸ të mund ta kuptoni bashkë me të gjithë shenjtërit çka është Gjerësia, Gjatësia, Lartësia dhe Thellësia ¹⁹ e ta merrni vesh dashurinë e Krishtit që kapërcen çdo dije kështu që të mbusheni me tërë plotësinë e Hyjit.

²⁰ E Atij, që, në saje të fuqisë që vepron në ne, mund të bëjë shumë më tepër se ne mund të kërkojmë ose edhe mund të mendojmë, ²¹ Atij i qoftë Lavdia në Kishë e në Jezu Krishtin në të gjitha breznitë e jetës së jetëve. Amen.

Kapitujt