Kapitujt

Efesianëve: 2. Prej vdekjes në jetë

¹ Edhe ju ishit të vdekur për shkak të fajeve e të mëkateve tuaja, ² në të cilat dikur keni jetuar, kur ndiqnit parimet e këtij shekulli, të prijësit që sundon mes qiellit e tokës, sipas atij shpirti që tani vepron në bijtë e padëgjesës... ³ Ndër ta edhe ne dikur jetonim në prirjet e ulëta të mishit e të gjakut tonë duke i kënaqur epshet e mishit e të sedrës dhe, prej natyre, ishim edhe ne, si tjerët, bij të lëshuar në dorë të hidhërimit.

⁴ Porse Hyji, i pasur me mëshirë, në saje të dashurisë së madhe, me të cilën na deshi, ⁵ ne që ishim të vdekur për shkak të fajeve, na ngjalli bashkë me Krishtin ‑ ju jeni të shëlbuar me hir ‑ ⁶ dhe, bashkë me të na ngjalli dhe na vendosi në qiell në Krishtin Jezus: ⁷ që me mirësinë e tij ndaj nesh në Jezu Krishtin ta tregojë në shekujt e ardhshëm pasurinë e vet të patregueshme. ⁸ Sepse me hir, në saje të fesë, jeni shëlbuar! Dhe kjo s’vjen prej jush, por është dhuratë e Hyjit! ⁹ E jo me anë të veprave që ndokush të mos lavdërohet. ¹⁰ Jemi vepër e tij, të krijuar në Krishtin Jezus për veprat e mira, që Hyji i përgatiti që më parë që të jetojmë në to.

Një gjë e vetme në Krishtin

¹¹ Këndej le t’ju bjerë në mend se dikur ishit paganë në trup ‑ quheshit “të parrethprerë” prej atyre që mbahen të rrethprerë, me dorë, në trup! ¹² Le t’ju bjerë në mend se në atë kohë ishit pa Mesinë, të përjashtuar nga nënshtetësia e Izraelit, të huaj për Besëlidhjet e premtimit, ishit të pashpresë e të pahyj në botë. ¹³ Por tani, në Jezu Krishtin, ju që ishit ‘larg’ erdhët ‘afër’ ‑ në saje të gjakut të Krishtit.

¹⁴ Përnjëmend Ai është Paqja jonë,

Ai që prej dy popujve bëri një

e përmbysi murin ndarës

d. m. th. armiqësinë ‑

në trupin e vet.

¹⁵ Ai e shfuqizoi Ligjin e urdhërimeve me të gjitha rregulloret,

me qëllim që prej dyve: paganëve e hebrenjve,

të trajtonte në vetvete një njeri të ri

e, duke vendosur paqen,

¹⁶ të dy t’i pajtonte në një trup me Hyjin

me anë të kryqit

duke e asgjësuar në vetvete armiqësinë.

¹⁷ E prandaj erdhi t’ju kumtojë paqen

juve që ishit larg

paqen edhe atyre që ishin afër.

¹⁸ Në saje të tij, pra, si njëra palë ashtu edhe tjetra,

kemi të drejtë të dalim para Atit

në fuqi të të njëjtit Shpirt Shenjt.

¹⁹ Prandaj, nuk jeni më të huaj e mërgimtarë, por jeni bashkëqytetarë të shenjtërve dhe anëtarë të familjes së Hyjit, ²⁰ të ndërtuar mbi themelin e vërtetë që janë apostujt e profetët, ku guri i këndit që mban gjithçka, është vetë Jezusi Mesi. ²¹ Në Të mbarë ndërtesa është e lidhur dhe rritet në tempull të shenjtë në Zotin. ²² Në të edhe ju jeni bërë pjesë e ndërtesës së përbashkët që të bëheni në Shpirtin Shenjt banesë e Hyjit.

Kapitujt