Kapitujt

Galatasve: 4. Kujdesi i Palit për galatasit

¹ Dua të them: Derisa trashëgimtari është i mitur, nuk dallohet në asgjë nga skllavi edhe pse është pronari i të gjithë pasurisë. ² Ai është nën kujdestarë e mbarështues deri në atë ditë që ka caktuar i ati. ³ Po kështu edhe ne. Kur ishim të mitur, ishim skllevër të parimeve fillestare të shekullit.

⁴ Por, kur erdhi koha e caktuar,

Hyji dërgoi Birin e vet,

të lindur prej gruaje,

të nënshtruar Ligjit,

⁵ që t’i shpërblente të nënshtruarit e Ligjit,

që ne ta fitonim bijësinë në shpirt.

⁶ E, ngaqë vërtet jeni bij:

Hyji e dërgoi në zemrat tona Shpirtin e Birit të vet,

i cili gërthet: Abba ‑ o Atë!

⁷ Këndej, më nuk je skllav, por bir;

e, pasi je bir,

atëherë, për vullnet të Hyjit, je edhe trashëgimtar.

Kujdesi i Palit për galatasit

⁸ Dikur, kur ende nuk e njihnit Hyjin, u shërbenit hyjnive, që, për kah natyra e tyre, nuk janë hyjni. ⁹

Por tani, kur e njohët Hyjin ‑ më mirë të them: kur Hyji ju njohu ju ‑ si tani rishtas të ktheheni te parimet e dobëta e të mjera dhe prapë rishtas doni të bëheni skllevër të tyre? ¹⁰ I kremtoni me kujdes disa ditë, muaj, stinë e vite! ¹¹ Gjithë po trembem se kot hoqa keq mes jush!

¹² Po ju lutem, o vëllezër, bëhuni si unë, se edhe unë u bëra si ju. Me asgjë nuk më fyet! ¹³ Ju e dini se me rastin e një sëmundjeje të trupit tim për herën e parë ju kam kumtuar Ungjillin; ¹⁴ dhe trazimin që jua bëri trupi im i sëmurë nuk e përbuzët dhe nuk treguat pakënaqësi, por, përkundrazi, më pranuat porsi engjëllin e Hyjit, porsi Jezu Krishtin. ¹⁵ Ku është tani ai gëzimi juaj i dikurshëm? E pra, unë ju dëshmoj se, të kishte qenë e mundshme, sytë tuaj i kishit nxjerrë për të m’i dhënë! ¹⁶ Kështu? A thua u bëra armiku juaj pse ju them të vërtetën?

¹⁷ Ata dëftojnë gjasme kujdes për ju, por jo në mënyrë të ndershme ‑ pse duan t’ju ndajnë [prej meje] ‑ që ju pastaj të jepeni me zell pas tyre. ¹⁸ Mirë është të jeni të rrethuar me kujdes qëllimmirë gjithmonë e jo vetëm kur jam pranë jush, ¹⁹ o fëmijët e mi, që unë ju rilind me dhimbje rishtas derisa Krishti të formohet në ju. ²⁰ Oh, sa dëshiroj të gjendem tani ndër ju, për të gjetur fjalën e përshtatshme për ju, sepse nuk jam në gjendje të vendos ç’të bëj me ju!

Alegoria me Agarën e me Sarën

²¹ E ju që dëshironi të jeni nën Ligj, më thoni, a nuk dëgjoni çka thotë Ligji? ²² Sepse, në Shkrimin e shenjtë thuhet se Abrahami pati dy djem: njërin prej skllaves e tjetrin prej të lirës. ²³ Ai prej skllaves është i lindur natyrisht, kurse ai prej gruas së lirë, në fuqi të premtimit. ²⁴ Kjo është alegori: këto gra paraqesin dy Besëlidhjet: njëra Besëlidhjen që vjen nga Mali Sinaj ‑ e cila lind për skllavëri ‑ e paraqitur me Agarën; ²⁵ e Agara do të thotë Mali Sinaj, që është në Arabi dhe i përgjigjet Jerusalemit të tanishëm ‑ sepse është në skllavëri me gjithë fëmijët e vet. ²⁶ Ndërsa Jerusalemi ‑ ai lart ‑ është i lirë, ai është Nëna jonë. ²⁷ Sepse në Shkrimin e shenjtë është:

“Galdo, beronjë, ti që nuk lind fëmijë,

gërthit në britmë hareje,

ti, që nuk i sprovon dhimbjet e lindjes,

sepse e përbuzura ka më shumë fëmijë

se ajo që e ka burrin!”

²⁸ Kurse ju, o vëllezër, jeni porsi Izaku ‑ fëmijët e premtimit. ²⁹ Dhe, sikurse asohere, ai që ishte i lindur natyrisht e salvonte atë që ishte i lindur sipas Shpirtit, ashtu ndodh edhe tani.

³⁰ Porse, çka thotë Shkrimi i shenjtë;

“Dëboje skllaven edhe djalin e saj, sepse biri i skllaves nuk mund të jetë trashëgimtar me djalin e gruas së lirë!”

³¹ Këndej, o vëllezër, nuk jemi bijtë e skllaves, por të së lirës!

Kapitujt