Kapitujt

1 e Timoteut: 1. Qortim lidhur me mësimet e rreme

¹ Pali, apostulli i Krishtit Jezus me

urdhër të Hyjit, Shëlbuesit tonë dhe të Krishtit Jezus, shpresës sonë:

² Timoteut, birit të vërtetë në fe:

hir, mëshirë dhe paqe prej Hyjit Atë, dhe prej Krishtit Jezus, Zotit tonë.

Qortim lidhur me mësimet e rreme

³ Sikurse të porosita kur u nisa për Maqedoni: zër vend në Efez për t’i urdhëruar disave disa të mos mësojnë mësime të tjera ⁴ dhe të mos merren me përralla dhe me gjenealogji të pakufishme që ndihmojnë më fort për diskutime të kota se sa për planin e Hyjit që realizohet në fe. ⁵ Qëllimi i këtij urdhri është dashuria që del nga zemra e pastër, nga ndërgjegjja e mirë dhe nga feja e çiltër. ⁶ Në këtë gjë disa e lanë rrugën dhe u sollën drejt mësimeve të fjalëve të kota. ⁷ Këta duan të jenë mësues të Ligjit e nuk kuptojnë as çka flasin as çka pohojnë.

⁸ Vërtet, ne e dimë se Ligji është i mirë kur ndokush e përdor si duhet, ⁹ i bindur për këtë se Ligji nuk është dhënë për njeriun e drejtë, por për të këqijtë, për të padëgjueshmit, për të mbrapshtët, për mëkatarët, për të pafetë, për blasfemuesit, për atëvrasësit, për mëmëvrasësit, për njerivrasësit, ¹⁰ për fëlligështarët, për homoseksualët, për tregtarët me njerëz, për gënjeshtarët, për beshtrembërit dhe për çdo vepër tjetër që është kundër mësimit të shëndoshë ‑ ¹¹ sipas Ungjillit të Lavdisë së Hyjit të lumtur, që më është besuar.

Falënderim për mëshirën e Krishtit

¹² E falënderoj Atë që më dha fuqi ‑ Krishtin Jezus, Zotin tonë ‑ pse më çmoi të besueshëm duke më thirrur në shërbesë ¹³ mua, që më parë isha blasfemues, salvues, arrogant. Por gjeta mëshirë pse veproja prej padijes, larg nga besimi i vërtetë. ¹⁴ Dhe hiri i Zotit tonë qe pa masë i begatshëm bashkë me fe dhe me dashuri që është në Krishtin Jezus.

¹⁵ Kjo fjalë është e vërtetë dhe meriton të besohet prej të gjithëve: Krishti Jezus erdhi në botë për të shëlbuar mëkatarët, ndër të cilët unë jam i pari. ¹⁶ Ai pati mëshirë për mua me qëllim që në mua, më të parin, Jezu Krishti ta dëftojë tërë zemërgjerësinë e vet për t’u dhënë shembull të gjithë atyre që do të besojnë në Të për të fituar jetën e pasosur.

¹⁷ Dhe Mbretit të shekujve,

të Pavdekshmit,

të Papashmit,

Një të Vetmit Hyj

i qoftë nder e lavdi

në shekuj të shekujve.

Amen!

¹⁸ Po ta jap këtë detyrë, biri im Timote, në përkim me profecitë që dikur u thanë mbi ty: Ti, i mbështetur në to, lufto luftën e mirë! ¹⁹ Ruaje fenë dhe ndërgjegjen e mirë, që disa e flakën dhe përjetuan anijethyrjen në fe. ²⁰ Ndër ta janë Himeneu dhe Aleksandri që i lashë në duart e Satanit me qëllim që të mësojnë të mos blasfemojnë.

Kapitujt