Kapitujt

1 e Selanikasve: 5. Qortimet dhe përshëndetjet e fundit

¹ Dhe për sa i përket kohës dhe momentit, vëllezër, as nuk është nevoja t’ju shkruaj, ² sepse vetë e dini mirë se Dita e Zotit vjen pikërisht si vjen vjedhësi natën. ³ Ndërsa njerëzit do të thonë: “Ç’paqe dhe ç’siguri!”, pikërisht atëherë, porsi dhimbjet e lindjes së gruas shtatzënë, do të vijë papritmas mbi ta rrënimi dhe nuk do të mund të shpëtojnë.

⁴ Porse ju, o vëllezër, nuk jeni në terr që Dita e Zotit t’ju vijë me befasi porsi vjedhësi: ⁵ sepse ju të gjithë jeni bijtë e dritës e të ditës! Pra, nuk jemi të natës e të territ! ⁶ Atëherë të mos flemë si të tjerët, por të rrimë zgjuar dhe të jemi të përkormë! ⁷ Sepse ata që flenë, flenë natën dhe ata që dehen, dehen natën, ⁸ ndërsa ne që jemi të ditës, të jemi të përkormë, të veshim për pancir fenë dhe dashurinë, kurse për përkrenare që na shpëton të vëmë shpresën! ⁹ Sepse Hyji nuk na ka caktuar për të qenë të ndëshkuar me drejtësinë hakmarrëse të tijën, por që ta fitojmë shpërblimin nëpër Zotin tonë Jezu Krishtin, ¹⁰ i cili vdiq për ne që ‑ ende të gjallë ose të vdekur ‑ të jetojmë bashkë me Të. ¹¹ Prandaj, ngushëlloni njëri‑tjetrin, ndërtoni njëri‑tjetrin, ashtu siç jeni duke bërë.

Qortimet dhe përshëndetjet e fundit

¹² Ju bëjmë lutje, vëllezër, dëgjoni ata që veprojnë ndër ju, që kujdesen për ju në Zotin dhe që ju qortojnë; ¹³ çmojeni dhe nderojeni me dashuri për arsye të veprimtarisë që kryejnë ndër ju!

Jetoni në paqe me shoqi‑shoqin! ¹⁴ Ju nxisim, vëllezër, t’i qortoni ata që nuk jetojnë në rregull, jepuni zemër frikacakëve, ndihmojini të ligshtët, jini bujarë me të gjithë! ¹⁵ Kini mendjen që askush të mos ia kthejë askujt të keqen me të keqe, por gjithmonë bëni të përparojë e mira ndër ju dhe kundrejt gjithkujt!

¹⁶ Gëzohuni gjithmonë!

¹⁷ Lutuni pa pushim!

¹⁸ Për gjithçka falënderoni! Sepse, në lidhje me ju, ky është vullneti i Hyjit në Jezu Krishtin!

¹⁹ Mos e pengoni Shpirtin Shenjt që të veprojë në ju!

²⁰ Profecitë mos i përbuzni!

²¹ Çdo gjë shqyrtojini me kujdes: mbani të mirën!

²² Çdo lloji të keqeje rrijini larg!

²³ Dhe Hyji, burimi i paqes, ai ju shenjtëroftë krejtësisht, dhe e tërë qenia juaj ‑ shpirti, jeta dhe trupi ‑ u ruajtë e patëmetë dhe e përsosur për Ardhjen e Zotit tonë Jezu Krishtit! ²⁴ Besnik është Ai që ju thërret: Ai do të bëjë ashtu!

²⁵ Lutuni edhe për ne, o vëllezër!

²⁶ Përshëndetni të gjithë vëllezërit me puthje të shenjtë!

²⁷ Ju përbetoj me Zotin: kjo letër le t’ju lexohet të gjithë vëllezërve.

²⁸ Hiri i Zotit tonë Jezu Krishtit qoftë me ju!

Kapitujt