Kapitujt

Kolosianëve: 1. Shërbesa e Palit në Kishë

¹ Pali, për vullnet të Hyjit apostull i Krishtit Jezus, edhe vëllai Timote:

² shenjtërve që janë në Kolos, vëllezërve besimtarë në Krishtin:

Hyji, Ati ynë, ju dhëntë hir e paqe!

Pali falënderon Hyjin për kolosianët

³ E falënderojmë Hyjin, Atin e Zotit tonë Jezu Krishtit dhe lutemi vazhdimisht për ju, ⁴ sepse morëm vesh për fenë tuaj në Jezu Krishtin dhe për dashurinë që keni ndaj të gjithë shenjtërve, ⁵ për arsye të shpresës që ruhet për ju në qiell. Për të keni dëgjuar në saje të fjalës së të vërtetës ‑ Ungjillit, ⁶ që arriti te ju dhe po jep fryte e po zhvillohet, si në mbarë botën, ashtu edhe ndër ju, që prejditës kur dëgjuat dhe e njohët hirin e Hyjit me anë të së vërtetës, ⁷ ashtu si e keni mësuar prej Epafrit të dashur, shokut tonë në shërbesë. Ai na zëvendëson ndër ju si mbarështues besnik i Krishtit. ⁸ Ai edhe na njoftoi për dashurinë tuaj në Shpirtin Shenjt.

Personi dhe vepra e Krishtit

⁹ Prandaj edhe ne, që atë ditë, kur morëm vesh për këtë gjë, nuk pushojmë së luturi për ju dhe të kërkojmë prej Hyjit të fitoni me çdo urti e kuptim shpirtëror njohurinë e plotë të vullnetit të tij, ¹⁰ që të jetoni në mënyrë të denjë për Zotin dhe t’i pëlqeni Atij plotësisht, duke dhënë fryte veprash të mira dhe duke përparuar në njohurinë e Hyjit, ¹¹ që të forcuar me çdo fuqi si i përgjigjet pushtetit të Hyjnisë së tij, të jeni të fortë e të durueshëm në çdo provë, që me gëzim ¹² ta falënderoni Atin, i cili ju bëri të aftë të keni pjesë në trashëgimin e shenjtërve në dritë.

¹³ Ai na nxori

nga pushteti i errësirës

dhe na kaloi

në Mbretërinë e Birit të vet të dashur,

¹⁴ në të cilin kemi shpërblimin

‑ faljen e mëkateve.

¹⁵ Ai është shëmbëllesa e Hyjit të papashëm,

i Parëlinduri ‑ para çdo krijese.

¹⁶ Sepse në Të u krijua çdo gjë

në qiell e në dhe,

çka shihet e çka nuk shihet:

qoftë Fronet, qoftë Zotërimet,

qoftë Principatat, qoftë Pushtetet

‑ gjithçka u krijua nëpër Të dhe për Të.

¹⁷ Ai është para çdo gjëje

dhe çdo gjë qëndron në Të.

¹⁸ Ai është Kryet e Trupit ‑ Kishës;

Ai është Fillimi,

i Parëlinduri ndër të vdekurit

‑ që të jetë në gjithçka i Pari.

¹⁹ Sepse Hyjit i pëlqeu

të banojë në Të e tërë Plotësia

dhe, me anë të Tij,

²⁰ ‑ duke vendosur paqen me anë të gjakut të kryqit [të Tij] ‑

të pajtojë me vete gjithçka

qoftë në tokë qoftë në qiell.

²¹ Edhe ju që dikur ishit të përjashtuar dhe armiq për shkak të veprave tuaja të këqija, ²² tani Hyji ju pajtoi me vete në saje të trupit të vdekshëm të Krishtit ‑ nëpër vdekje ‑ që t’ju nxjerrë para Tij të shenjtë, të drejtë e të patëmetë. ²³ Por duhet të qëndroni të themeluar në fe, të qëndrueshëm dhe të palëkundshëm në shpresën që jep Ungjilli, për të cilin dëgjuat, i cili iu predikua secilës krijesë nën qiell. Këtij Ungjilli unë Pali iu bëra mbarështues.

Shërbesa e Palit në Kishë

²⁴ Dhe tani vetë u gëzohem vuajtjeve të mia për të mirën tuaj dhe plotësoj në trupin tim çka u mungon mundimeve të Krishtit për Trupin e tij ‑ Kishën. ²⁵ U bëra mbarështues i Saj në fuqi të misionit që Hyji më caktoi për të mirën tuaj që ta bëj të njohur njëherë e përgjithmonë Fjalën e Hyjit: ²⁶ ‑ Misterin e mbajtur fshehur gjatë shekujsh dhe breznish, të cilin tani ua zbuloi shenjtërve të tij. ²⁷ Këtyre Hyji deshi t’ua bëjë të njohur lavdinë e begatshme të këtij Misteri në paganë: d. m. th. : Krishti është ndër ju, shpresa e lavdisë! ²⁸ Ne kumtojmë Atë. Qortojmë çdo njeri dhe mësojmë gjithkënd me çdo njohuri për të bërë që gjithkush të arrijë përsosmërinë në Krishtin. ²⁹ Për këtë arsye edhe mundohem dhe luftoj me ndihmën e fuqisë së tij i cili me plot fuqi vepron në mua në mënyrë të pushtetshme.

Kapitujt