Kapitujt

Kolosianëve: 3. Detyrat shoqërore të jetës së re

¹ Nëse, pra, u ngjallët bashkë me Krishtin, kërkoni çka është lart, ku gjendet Krishti ndenjur në fron në të djathtën e Hyjit! ² Dëshironi gjërat që janë lart e jo këto përmbi tokë! ³ Sepse vdiqët dhe jeta juaj është e fshehur me Krishtin në Hyjin. ⁴ E kur të duket Krishti ‑ Jeta juaj, atëherë edhe ju bashkë me Të do të shfaqeni plot lavdi.

⁵ Bëni, pra, të vdesin gjymtyrët tuaja, ato tokësoret: fëlligështia, papastërtia, epshet, dëshirat e këqija, lakmimi i tepruar i pasurisë ‑ që është idhujtari ‑ ⁶ për shkak të tyre vjen hidhërimi i Hyjit [mbi ata që nuk dëgjojnë]. ⁷ Po, dikur edhe ju ecët kësaj udhe, kur jetuat në këto vese. ⁸ Por tani edhe ju flakni larg të gjitha këto: hidhërimin, zemërimin, të keqen, blasfeminë; goja juaj të mos përdorë fjalë të ndyta! ⁹ Mos rreni njëri‑tjetrin!

Ju e zhveshët njeriun e vjetër me veprat e tij ¹⁰ dhe veshët njeriun e ri që përtërihet në njohurinë e drejtë në përgjasim të Krijuesit të vet. ¹¹ Aty nuk ka më:

grek ‑ hebre,

rrethprerje ‑ parrethprerje,

barbar ‑ skit,

skllav ‑ të lirë,

por Krishti është gjithçka dhe në të gjithë.

¹² Vishuni, pra, pasi jeni të zgjedhurit e Hyjit, shenjtër e të dashur me zemër të dhimbshme, me mirësi, me përvujtëri, me butësi, me duresë. ¹³ Durojeni njëri‑tjetrin dhe faleni njëri‑tjetrin në qoftë se ndokush ka ndonjë ankim kundër tjetrit. Sikurse Zoti ju fali ju, po ashtu bëni edhe ju! ¹⁴ E pastaj, përmbi të gjitha vishuni me dashurinë! Ajo i mban së bashku të gjitha virtytet. ¹⁵ Paqja e Krishtit mbretëroftë në zemrat tuaja ‑ në të cilën edhe jeni të grishur të jeni të gjithë një Trup i vetëm. Dhe jini mirënjohës!

¹⁶ Fjala e Krishtit banoftë në ju me tërë begatinë e vet! Mësoni çdo dije dhe këshillojeni njëri‑tjetrin me plot urti! Këndojini lavde Hyjit me gjithë zemër me psalme, himne dhe këngë të përshpirtshme! ¹⁷ Çkado që të thoni dhe të bëni, le të jetë në nder të Emrit të Jezusit Zot, duke falënderuar me anë të Tij Hyjin Atë.

Detyrat shoqërore të jetës së re

¹⁸ Ju gra, dëgjojini burrat tuaj ashtu si ka hije në Zotin. ¹⁹ Ju burra, duajini gratë tuaja dhe mos jini me to të vrazhdët!

²⁰ Ju fëmijë, dëgjojini prindërit në gjithçka, sepse kjo gjë i pëlqen Zotit. ²¹ Ju etër, mos i tutukatni fëmijët tuaj që të mos e humbin guximin.

²² Ju skllevër, dëgjojini zotërinjtë tuaj tokësorë në gjithçka, jo vetëm ndër sy sikurse të doni t’u pëlqeni njerëzve, por me thjeshtësinë e zemrës, me frikën e Zotit. ²³ Çfarëdo pune që të bëni, bëjeni me vullnet, si ta bënit për Zotin e jo për njerëz ²⁴ të sigurtë se do të merrni prej Zotit trashëgimin si shpërblim. Zotëria është Krishti; shërbejini Atij! ²⁵ Patjetër, ai që bën padrejtësi, do të shpaguhet për padrejtësinë që bëri. Nuk ka krahambajtje.

Kapitujt