Kapitujt

1 e Pjetrit: 4. Mbarështuesi i mirë i hirit të Hyjit

¹ Këndej, pasi Krishti pësoi në trup, edhe ju armatosuni me të njëjtën bindje: kush ka vuajtur në trup është ndarë plotësisht nga mëkati - ² që ta kaloi këtë pjesë të jetës tokësore që ju mbetet, jo më sipas parimeve të prirjeve njerëzore, por sipas vullnetit të Hyjit. ³ Sepse, është mjaft që në kohën e shkuar e kryet vullnetin e paganëve duke jetuar në fëlligështi, në dëshirime të ulëta, në zdërhallje, në pije, në punë të pahijshme, në adhurim të palejueshëm të idhujve. ⁴ Prandaj ata edhe çuditen për ju pse nuk vraponi bashkë me ta në të njëjtin det poshtërsish dhe flasin keq për ju. ⁵ Ata do t’i japin llogari Atij që është gati të gjykojë të gjallët e të vdekurit. ⁶ Për këtë arsye u predikua Ungjilli edhe atyre që vdiqën që të gjykohen sipas njerëzve në trup - e të jetojnë sipas Hyjit në shpirt.

⁷ Për çdo gjë u afrua mbarimi! Zgjohuni, pra, dhe jini të përkormë që t’i kushtoheni lutjes! ⁸ Para së gjithash kini dashuri të vazhdueshme për njëri-tjetrin, sepse: »Dashuria mbulon një shumicë mëkatesh«.

⁹ Jini mikpritës pa murmurima kundrejt shoqi-shoqit. ¹⁰ Shërbejini njëri-tjetrit, secili sipas dhuratës që keni marrë: si mbarështues të mirë të hirit të shumëllojshëm të Hyjit. ¹¹ Kush flet, le të flasë për të shpallur fjalën e Hyjit. Nëse ndokush ka dhuratën e shërimit, le ta bëjë me fuqinë që i jep Hyji, që në gjithçka t’i jepet lavdi Hyjit nëpër Jezu Krishtin, të cilit i qoftë lavdi e pushteti në shekuj të shekujve. Amen.

Të krishterit i takon të vuajë

¹² Fort të dashur! Mos iu çuditni zjarrit të salvimit që është ndezur në mesin tuaj për t’iu vënë në provë, thua se po ju ndodh diçka e jashtëzakonshem, ¹³ por, përkundrazi, gëzohuni si pjesëtarë të mundimeve të Krishtit që edhe në Ditën e Zbulesës së lavdisë së tij të mund të galdoni me hare. ¹⁴ Të lumët ju në qoftë se ju fyejnë për shkak të Emrit të Krishtit, sepse Shpirti i Lavdisë, i Hyjit, pushon në ju. ¹⁵ Por vëriani mendjen që asgjë ndër ju të mos vuajë o si vrastar, o si vjedhës, o si keqbërës ose edhe vetëm si njeri që përzihet në punët e huaja; ¹⁶ por, nëse vuan si i krishterë, kurrsesi të mos ketë turp, por ta lavdërojë Hyjin për shkak të këtij Emri. ¹⁷ Sepse, arriti dita të fillojë gjyqi nga shtëpia e Hyjit. E, nëse më së pari fillon prej nesh, po si do të jetë atëherë mbarimi i atyre që nuk i binden Ungjillit të Hyjit?

¹⁸ »Në qoftë se i drejti mezi shëlbohet, po çka do të ndodhë me të mbrapshtin e me mëkatarin?«

¹⁹ Këndej, edhe ata që pësojnë sipas vullnetit të Hyjit, me vepra të mira le t’ia porosisin shpirtrat e vet Krijuesit besnik.

Kapitujt