Kapitujt

Jakobi: 3. Gjuha

¹ Vëllezërit e mi, mos u bëni shumë mësues, duke e ditur se do të gjykohemi më rëndë. ² Për të vërtetë, të gjithë gabojmë shumë. Në qoftë se ndokush nuk gabon në fjalë, ai është njeri i përsosur, i aftë të sundojë mbarë trupin. ³ Nëse kuajve u vëmë frerët në gojë për t’i vënë nën sundim, atëherë mund të drejtojmë mbarë trupin e tyre. ⁴ Ja, edhe anijet: sa të mëdha janë ato dhe sa të forta erërat që i shtyejnë! E pra, një timon i vogël i drejton atje ku do timonieri! ⁵ Kështu edhe gjuha është një gjymtyrë e vogël, por mund të mburret për gjëra të mëdha.

Ja, një zjarr i vogël se ç’pyll të madh mund të djegë! ⁶ Po, edhe gjuha është zjarr! Një botë e tërë padrejtësie është gjuha mes gjymtyrëve tona, ajo që e fëlliq të gjithë trupin dhe, e ndezur nga ferri, e bën shkrumb të tërë jetën. ⁷ E njëmend, të gjitha llojet e egërsirave, të shpendëve, të zvarranikëve dhe të kafshëve të detit mund të zbuten, dhe njerëzit i kanë vënë nën sundim, ⁸ kurse gjuhën – e keqe e paqetësueshme, plot vrer që sjell vdekjen – asnjë njeri nuk mund ta mbizotërojë.

⁹ Me të lavdërojmë Zotin edhe Atin, por me të edhe mallkojmë njerëzit e krijuar në përngjasimin e Hyjit: ¹⁰ prej të njëjtës gojë del bekimi dhe mallkimi. E pra, vëllezërit e mi, nuk duhet të jetë ashtu! ¹¹ A thua burimi nga e njëjta vrimë qet ujë të ëmbël e të hidhur? ¹² A thua, vëllezërit e mi, fiku mund të prodhojë ullinj? Ose hardhia fiq? As burimi i njelmët nuk mund të qesë ujë të ëmbël.

Urtia prej së larti

¹³ A është ndokush ndër ju i urtë dhe i mençur? Me sjellje të bukur le t’i dëftojë veprat e veta të frymëzuara nga butësia me urti. ¹⁴ Por, në qoftë se në zemrën tuaj keni smirën e hidhur dhe shpirtin e grindjes, mos u mbani me të madh dhe mos rreni kundër së vërtetës! ¹⁵ Kjo urti nuk është ajo që vjen prej së larti, por është tokësore, shqisore, djallëzore. ¹⁶ Sepse, ku është smira dhe grindja, atje ka pështjellim dhe çdo të keqe. ¹⁷ Kurse urtia që vjen prej së larti më së pari është e pastër, pastaj pajtuese, e butë, e përshtatshme, plot mëshirë dhe vepra të mira, e durueshme dhe jo shtiake. ¹⁸ Fryti i drejtësisë mbillet në paqe për ata që punojnë për paqe.

Kapitujt