Kapitujt

Titit: 2. Predikimi i mësimit të shëndoshë

¹ Ti veç, mëso çka është në përkim me mësimin e shëndoshë: ² që pleqtë të jenë të përkormë, të ndershëm, të urtë, të shëndoshë në fe, në dashuri dhe në qëndresë. ³ Po ashtu edhe plakat: të kenë sjellje si u ka hije shenjtërve: jo shpifëse, jo të dhëna pas verës, por mësuese të së mirës: ⁴ t’i mësojnë gratë e reja t’i duan burrat e vet dhe fëmijët e vet: ⁵ të jenë të urta, të pastra, shtëpiake me mend, të mira, t’u binden burrave të vet – që fjala e Hyjit të mos shahet.

⁶ Po ashtu nxiti të rinjtë që të jenë të përkormë. ⁷ Në çdo gjë ji shembull me vepra të mira: në mësim - përpikërinë, denjësinë; ⁸ fjala të jetë e shëndoshë, e patëmetë që kundërshtari, duke mos pasur çka të flasë keq për ne, të turpërohet.

⁹ Skllevërit le t’u nënshtrohen zotërinjve të vet në gjithçka; të mundohen t’u pëlqejnë dhe të mos u kundërshtojnë me fjalë, ¹⁰ të mos vjedhin, por vazhdimisht të japin provën e besnikërisë së vërtetë. Kështu do t’i japin lavdi në gjithçka mësimit të Hyjit, Shëlbuesit tonë.

¹¹ Vërtet u duk hiri i Hyjit që u sjell shëlbimin të gjithë njerëzve. ¹² Ai na mëson t’i biem mohit mosbesimit dhe dëshirave të shekullit për të jetuar në këtë botë urtisht, drejtësisht dhe përshpirtërisht, ¹³ duke pritur shpresën e lume dhe Ardhjen e lavdisë së të madhit Hyj dhe Shëlbuesit tonë, Jezu Krishtit. ¹⁴ Ai e flijoi vetveten për ne që të na shpërblejë nga çdo paudhësi dhe ta pastrojë që Atij i përket, që të jetë plot zell për të kryer vepra të mira.

¹⁵ Për këto gjëra fol, këto porositi dhe qorto me çdo pushtet!

Askush të mos ketë guxim të të përbuzë!

Kapitujt