Kapitujt

1 e Timoteut: 4. Parakallëzimi i apostazisë

¹ Shpirti Shenjt shpall botërisht se në kohën e fundit disa njerëz do t’i bien mohit fesë dhe do t’u besojnë shpirtrave të rrejshëm dhe mësimeve të frymëzuara nga djajtë, ² të ngashnjyer nga hipokrizia e rrenacakëve me ndërgjegje të shënuar me hekur të skuqur, ³ të cilët ndalojnë martesën dhe urdhërojnë të mos hahen ushqimet që Hyji i ka krijuar për t’i ngrënë me falënderim besimtarët që e njohin të vërtetën. ⁴ Sepse gjithçka Hyji krijoi është e mirë dhe asgjë s’është për t’u përçmuar, nëse merret me falënderim, ⁵ sepse e shenjtëron fjala e Hyjit dhe lutja.

Shërbëtori i mirë i Krishtit

⁶ Në qoftë se ua mëson vëllezërve këto të vërteta do të jesh mbarështues i mirë i Krishtit Jezus, i ushqyer mirë me fjalë feje dhe me mësimin e mirë që vazhdimisht e ndjek. ⁷ Hiqju përrallave të shekullit e të plakave! Më mirë ushtrohu në përshpirtëri! ⁸ Vërtet, ushtrimi trupor pak ka vlerë, kurse përshpirtëria është e dobishme për gjithçka, sepse sjell me vete premtimin e jetës së tashme dhe të asaj të ardhshmes. ⁹ Kjo fjalë është e denjë të besohet dhe të pranohet prej të gjithëve: ¹⁰ prandaj vuajmë dhe luftojmë pse shpresojmë në Hyjin e gjallë që është Shëlbuesi i të gjithëve, sidomos i besimtarëve. ¹¹ Këto gjëra urdhëroj dhe mësoj!

¹² Askush të mos e përbuzë moshën tënde të re, por bëhu shembull për besimtarët në fjalë, në sjellje, në dashuri, në fe, në pastërti! ¹³ Derisa të vij kushtohu Leximit, këshillimit dhe mësimit. ¹⁴ Mos e lër pas dore hirin që është në ty, i cili të qe dhënë në saje të profecive dhe me vënien e duarve të kolegjit të pleqve. ¹⁵ Kujdesohu për këto, jepu tërësisht pas tyre, që përparimi yt të jetë i dukshëm për të gjithë. ¹⁶ Vërja mendjen vetes dhe mësimit! Të jesh i qëndrueshëm në këto gjëra! Sepse, duke vepruar kështu, do të shëlbosh veten dhe ata që të dëgjojnë.

Kapitujt