Kapitujt

1 e Timoteut: 3. Cilësitë e mbikëqyrësit

¹ Është plotësisht e vërtetë fjala: “Në qoftë se ndokush dëshiron të bëhet mbikëqyrës, dëshiron një punë të ndershme”. ²

Por, veç, duhet që mbikëqyrësi të jetë i patëmetë, vetëm një herë i martuar, i përkormë, i arsyeshëm, i urtë, mikpritës, i aftë të mësojë, ³ jo i prirë kah pija, jo i dhunshëm. Përkundrazi, i butë, jo ngatërrestar, jo lakmues të hollash, ⁴ njeri që e udhëheq mirë shtëpinë e vet, që fëmijët e vet i mban nën drejtim me plot seriozitet ‑ [⁵ sepse, po nuk diti ndokush ta udhëheqë familjen e vet, si do të dijë të kujdeset për Kishën e Hyjit?] ‑ ⁶ të mos jetë posa i kthyer në fe, që të mos i rritet mendja e të bjerë në dënimin e djallit. ⁷ Madje duhet të gëzojë zë të mirë edhe ndër ata të jashtmit, që të mos bëhet gazi i kujt dhe të bjerë në leqe të djallit.

Cilësitë e diakonëve

⁸ Po kështu duhet të jenë edhe diakonët: të matur, jo mësalla me dy faqe, jo të dhënë tepër pas verës, as lakmues fitese të ndytë, ⁹ por nga ata që e ruajnë misterin e fesë në ndërgjegje të pastër. ¹⁰ Më parë le të vihen në provë e, nëse të sprovuar, dalin të patëmetë, atëherë le ta kryejnë shërbesën.

¹¹ Gjithashtu edhe gratë le të jenë të matura, jo shpifëse, por të përkorme dhe besnike në gjithçka.

¹² Diakonët të jenë burra të një gruaje, t’i udhëheqin mirë fëmijët e vet dhe shtëpitë e veta. ¹³ Sepse ata që e kryejnë mirë shërbesën e diakonit fitojnë shkallë të ndershme dhe siguri të madhe në fenë që është në Krishtin Jezus.

Misteri në të cilin themelohet përshpirtëria

¹⁴ Po t’i shkruaj të gjitha këto edhe pse shpresoj se së shpejti do të vij te ti, ¹⁵ por, në qoftë se do të vonoj, të dish si duhet të sillesh në Shtëpinë e Hyjit, që është Kisha e Hyjit të gjallë, shtylla dhe mbështetja e së vërtetës. ¹⁶ S’ka dyshim, i madh është misteri i përshpirtërisë:

Krishti u dëftua në natyrën e njeriut,

u shfajësua me Shpirtin Shenjt,

u vrojtua nga engjëjt,

u predikua ndër paganë,

u besua nga bota,

u ngrit në lavdi.

Kapitujt