Kapitujt

2 e Selanikasve: 2. Njeriu i fajit Antikrishti

¹ Në lidhje me Ardhjen e Zotit tonë Jezu Krishtit dhe me bashkimin tonë rreth tij, ju bëjmë lutje, vëllezër, ² mos lejoni të merreni mendsh dhe as mos u trazoni për shkak të ndonjë vegimi gjasme profetik, ose të ndonjë fjale ose të ndonjë letre gjasme të shkruar prej nesh, thua se ja, arriti Dita e Zotit! ³ Mos lejoni t’ju gënjejë kush në asnjë mënyrë! Sepse njëherë duhet të ndodhë rënia nga feja (apostazia) dhe të shfaqet Njeriu i fajit, biri i Bjerrjes, ⁴ Kundërshtari, ai që e ngre veten kundër çdo qenieje që quhet Hyj dhe gjë e shenjtë, sa që ta vërë veten edhe në Tempull të Hyjit, duke e paraqitur veten për Hyj.

⁵ Po a nuk ju bie ndër mend se kur isha ndër ju, jua thosha këtë gjë? ⁶ Tani e dini çka e ndalon, që të shfaqet vetëm në kohën e vet. ⁷ Vërtet, misteri i paudhësisë është tashmë në veprim, por është diçka që e ndalon derisa të hiqet tutje. ⁸ Atëherë do të shfaqet i Paudhi, të cilin Zoti [Jezus] do ta mbysë me frymën e gojës së vet dhe do ta zhdukë me shkëlqimin e Ardhjes së vet të dukshme. ⁹ I Paudhi do të vijë me pushtetin e Satanit dhe do të bëjë gjithfarë mrekullish, shenjash dhe çudish të rreme. ¹⁰ Ai me ngashnjime të padrejta do t’i gënjejë ata që birren për arsye se nuk e pranuan dashurinë e të vërtetës që i kishte shëlbuar. ¹¹ Prandaj edhe Hyji ua dërgon një fuqi që i bën të gabojnë e t’i besojnë gënjeshtrës, ¹² që të dënohen të gjithë ata që nuk i besuan të vërtetës, por përqafuan padrejtësinë.

Jeni të zgjedhur të shëlboheni

¹³ Kurse neve na duhet ta falënderojmë gjithmonë Hyjin për ju, vëllezër të dashur prej Zotit, sepse Hyji ju zgjodhi që prejfillimit për shëlbimin që fitohet me anë të veprës shenjtëruese të Shpirtit Shenjt dhe të fesë së vërtetë, ¹⁴ në të cilën ju grishi me anë të Ungjillit tonë ‑ që ta fitoni lumturinë e Zotit tonë Jezu Krishtit.

¹⁵ Prandaj, o vëllezër, jini të qëndrueshëm dhe mbajini porositë që i morët prej nesh qoftë me anë të fjalës qoftë me anë të Letrës sonë.

¹⁶ Dhe vetë Zoti ynë Jezu Krishti dhe Hyji, Ati ynë, që na dëftoi dashuri dhe na dhuroi me anë të hirit të vet ngushëllimin e amshuar dhe shpresën e lume, ¹⁷ Ai i ngushëlloftë zemrat tuaja dhe i forcoftë në çdo vepër dhe fjalë të mirë.

Kapitujt