Kapitujt

2 e Timoteut: 3. Karakteri i njerëzve të ditëve të fundit

¹ Edhe këtë duhet ta dish: në ditët e fundit do të vijnë kohë të vështira. ² Sepse njerëzit do të jenë egoistë, lakmues të hollash, krenarë, madhështorë, blasfemues, nuk do t’i dëgjojnë prindërit, të mosmirënjohës, ateistë, ³ të padhimbshëm, të papajtueshëm, shpifës, të panënshtrueshëm, të panjerëzishëm, të dhunshëm, që s’e duan të mirën, ⁴ tradhtarë, të ngutshëm, të verbuar prej krenarisë, të dhënë më fort pas ëndjes se sa pas Hyjit. ⁵ Ata do ta ruajnë dukjen e jashtme të përshpirtërisë, por kanë për ta mohuar fuqinë e saj. Edhe këtyre iku! ⁶ Prej këtyre janë ata që hyjnë nëpër shtëpi dhe i shtiejnë në leqet e veta gratë e ngarkuara me mëkate, të nxitura nga lloj-lloj prirjesh, ⁷ të cilat gjithmonë mësojnë e kurrë nuk mund ta arrijnë njohurinë e së vërtetës. ⁸ Sikurse edhe Janesi dhe Jambresi i kundërshtuan Moisiut, po kështu edhe këta i kundërshtojnë së vërtetës. Janë njerëz të prishur në tru e, në çështje të fesë, batalla. ⁹ Por nuk do të përparojnë më sepse marrëzia e tyre do të dalë në shesh siç u ngjau edhe atyre.

Ti qëndro i palëkundshëm

¹⁰ Ti veç, më ke përcjellë për së afërmi në mësimin tim, në sjellje, në synime, në fe, në duresë, në dashuri, në qëndresë, ¹¹ në salvime, në mundime, që më ndodhën në Antioki, në Ikon, në Listër. Se ç’salvime kam sprovuar! por prej të gjithave Zoti vetë më shpëtoi. ¹² Veçse edhe të gjithë ata që duan të jetojnë me përshpirtëri në Krishtin Jezus, do të salvohen. ¹³ Përkundrazi, njerëzit e këqij dhe gënjyes do të përparojnë prej së keqes në më zi – duke gënjyer të tjerët dhe duke u gënjyer edhe ata vetë.

¹⁴ Ti veç, qëndro në mësimin që ke marrë dhe në atë që t’u besua duke e ditur se prej kujt i mësove ¹⁵ dhe se që prejfëmijërisë e njeh Shkrimin e shenjtë, i cili është i aftë të japë dijen që çon në shëlbim me anë të fesë në Jezu Krishtin. ¹⁶ I tërë Shkrimi i shenjtë, hyjnisht i frymëzuar, është i dobishëm për të mësuar, për të bindur, për të rregullluar, për të edukuar në drejtësi, ¹⁷ që njeriu i Hyjit të jetë i përsosur, i përshtatur për të kryer çdo vepër të mirë.

Kapitujt