Kapitujt

2 e Timoteut: 1. Falënderim Hyjit

¹ Pali, apostulli i Krishtit Jezus për vullnet të Hyjit i dërguar për të shpallur jetën e premtuar që është në Krishtin Jezus: ² Timoteut, birit të dashur: hir, mëshirë, paqe prej Hyjit Atë dhe prej Krishtit Jezus, Zotit tonë.

Falënderim Hyjit

³ E falënderoj Hyjin, të cilit i shërbej, sikurse edhe të parët e mi, me ndërgjegje të pastër, ndërsa pa pushim të kujtoj në lutja të mia natë e ditë. ⁴ Dhe, kur më bien në mend lotët e tu, më kap një dëshirë e madhe të të shoh ty që të mbushem me gëzim. ⁵ Kujtoj fenë e çiltër që është në ty, që më parë ishte në gjyshen tënde Loidën dhe në nënën tënde Eunikën dhe jam i bindur se banon edhe në ty.

⁶ Këndej të përkujtoj ta ringjallësh dhuratën e hirit të Hyjit që është në ty në saje të vënies së duarve të mia. ⁷ Sepse Hyji nuk na e ka dhënë shpirtin e frikës, por përkundrazi, shpirtin e virtytit, të dashurisë dhe të urtisë. ⁸ Prandaj mos të të vijë turp ta dëshmosh Zotin tonë, as mua të burgosurin e tij, por hiq keq bashkë me mua për Ungjill duke u mbështetur në fuqinë e Hyjit, ⁹ i cili na shëlboi dhe na grishi me thirrje të shenjtë – jo në saje të veprave tona, por në saje të vullnetit të vet dhe të hirit, që na u dha që prejamshimit në Jezu Krishtin ¹⁰ dhe u dëftua tani me Ardhjen e Shëlbuesit tonë Jezu Krishtit. Ky e asgjësoi vdekjen dhe bëri të shndrisë jeta dhe pavdekësia me anë të Ungjillit, ¹¹ për të cilin Hyji më caktoi të jem predikatar, apostull dhe mësues.

¹² Ja, pra, përse unë edhe i duroj këto vuajtje! Por nuk më vjen turp sepse e di se kujt i kam besuar dhe jam i sigurt se Ai është i zoti ta ruajë thesarin që m’u besua deri në atë Ditë.

¹³ Ki për normë fjalët e shenjta që i ke dëgjuar prej meje në fe e në dashuri që është në Krishtin Jezus. ¹⁴ Ruaje, me ndihmën e Shpirtit Shenjt që banon në ne, thesarin e paçmueshëm të fesë që t’u besua.

¹⁵ Do të kesh marrë vesh se në Azi të gjithë ikën e më lanë. Ndër ta janë edhe Figeli dhe Hermogeni. ¹⁶ Hyji e pajistë me mëshirën e vet familjen e Oneziforit sepse shpeshherë ma ka freskuar shpirtin dhe nuk ka pasur turp për prangat e mia. ¹⁷ Përkundrazi, kur erdhi në Romë, më kërkoi me kujdes dhe më gjeti – ¹⁸ ia dhëntë Zoti fatin të gjejë mëshirën hyjnore në Ditën e Gjyqit! Por edhe sa shërbimet m’i bëri në Efes, ti i di më mirë se askush!

Kapitujt