Kapitujt

Nahumi: 1. Hyrje

¹ Profecia mbi Ninivën. Libri i vegimit të Nahumit Elcezeas.

HYRJE

Psalm. Zemërimi i Zotit

² Hyj ziliqar e hakmarrës është Zoti!

Hakmarrës është Zoti e plot zemërim!

Hakmarrës është Zoti kundër armiqve të vet,

dhe ruan zemërimin për kundërshtarët e vet.

³ Zoti është i durueshëm e i madhërueshëm në fuqi,

s’ka fajtor që e lë të pandëshkuar!

Udha e tij në shtrëngatë edhe në vorbull,

retë janë pluhuri i këmbëve të tij!

⁴ Kërcënon detin e ai thahet,

të gjithë lumenjtë i shndërron në shkretëtirë!

U shkrumbuan Basani e Karmeli,

u vyshk lulja e Libanit!

⁵ Para tij tunden malet,

dridhen kodrat,

trandet toka para tij,

e gjithësia me banorë të vet!

⁶ Kush mund të qëndrojë para zemërimit të tij,

t’i bëjë ballë flakës së zemërimit të tij?

Inati i tij u derdh si zjarri,

dhe qetat u shkrinë prej vapës së tij!

⁷ I mirë është Zoti,

është strehim në ditë të vështirë,

i njeh ata që në të kanë shpresën

⁸ edhe kur vërshon përmbytja.

Do t’i shuajë kundërshtarët e vet,

armiqtë e tij do t’i hajë terri!

Qortime profetike Judës e Ninivës

/Judës/

⁹ Çfarë mendoni kundër Zotit?

Ai është ai që asgjëson çdo gjë!

S’ka nevojë të ndrydhë dy herë!

¹⁰ Si ferrat e dendura

ndër vete të gërshetuara,

si pijanecat e dehur,

do të asgjësohen si kashta krejt e thatë!

/Asurit/

¹¹ Prej teje doli

ai që Zotit të keqen ia mendon,

këshilltari që synon kryengritjen!

/Judës: vegim/

¹² Kështu thotë Zoti:

“Le të jenë të fortë, le të jenë, në dashtë, shumë,

do të krasiten e do të zhduken!

Ty të ndëshkova,

porse nuk do të të ndëshkoj!

¹³ Copë do ta bëj shkopin që shpinës të binte,

vargonjtë e tu grimë‑grimë do t’i bëj”!

/Mbretit të Ninivës: vegim/

¹⁴ Për ty Zoti do ta japë këtë urdhër:

“Nuk do të lindë më djalë në vatër!

Në tempull të hyjit tënd do të zhduk

idhujt e gdhendur e të shkrirë

e do ta vë varrin tënd

sepse i pandershëm je!”

/Judës/

Kapitujt