Kapitujt

2 i Kronikave: 27. Mbretërimi i Joatamit

¹ Kur filloi të mbretëronte, Joatami kishte njëzet e pesë vjet dhe mbretëroi në Jerusalem gjashtëmbëdhjetë vjet. E ëma quhej Jerusë dhe ishte bija e Sadokut. ² Bëri atë që ishte e drejtë në sytë e Zotit duke i përngjasuar sjelljes së babait të tij, Ozisë, me përjashtim se nuk hyri në Tempullin e Zotit. Por populli vazhdonte ta linte rrugën e Zotit.

³ Ai e ndërtoi derën e Lartë të Shtëpisë së Zotit dhe bëri shumë punime në murin e Ofelit. ⁴ Ndërtoi gjithashtu edhe qytete në malet e Judës dhe ndërtoi kështjella e pirgje në pyje. ⁵ Luftoi kundër mbretit të bijve të Amonit dhe i mundi kështu, bijtë e Amonit i dhanë atë vit njëqind talenta argjendi, dhjetë mijë kore grurë dhe po aq kore elb. Kaq i dhanë bijtë e Amonit edhe në vitin e dytë edhe në vitin e tretë. ⁶ Joatami erdhi dhe u përforcua sepse i drejtoi udhët e veta në praninë e Zotit, Hyjit të vet.

⁷ Veprat e tjera të Joatamit, jeta e tij, si dhe të gjitha luftërat që i bëri, janë të shkruara në Librin e Mbretërve të Izraelit e të Judës. ⁸ Kur u bë mbret ishte njëzet e pesë vjeçar dhe mbretëroi në Jerusalem gjashtëmbëdhjetë vjet. ⁹ Edhe Joatami pushoi me etërit e vet dhe e varrosën në Qytetin e Davidit. Në vend të tij u bë mbret i biri, Akazi.

Kapitujt