Kapitujt

Jozuehu: 16. Fisi i Efraimit

¹ Me short u ra bijve të Jozefit toka

prej Jordanit përballë Jerikut, tek ujërat e tij në lindje, shkretëtira që ngjitet prej Jerikut në malin e Betelit ² dhe del nga Betel Luzi e kalon nëpër kufi të arakitëve në Atarot ³ dhe zbret në perëndim në kufi të Jefletit deri në kufi të Betoronit të Poshtëm dhe të Gazerit. Tokat e tyre marrin fund me Detin e Madh. ⁴ Bijtë e Jozefit, Manaseu dhe Efraimi, i morën këto për trashëgimin e vet.

⁵ Pjesa e trashëgimit të bijve të Efraimit, sipas vëllazërive të tyre, ishte: kufiri i pronës së tyre në krahun e lindjes shkonte prej Atarotadarit deri në Betoronin e Sipërm. ⁶ Prej këndej shtrihej deri në det, prej Makmetatit merrte në veri e pastaj sillej në lindje në Tanatselon e përshkon prej lindjes në Janoe. ⁷ Prej Janoesë zbret në Atarot e në Naaratë dhe arrin në Jerik dhe prek në Jordan. ⁸ Prej Tapfuasë kufiri kalonte në perëndim në përruan Kana e dilte në det: kjo është prona e fisit të bijve të Efraimit sipas vëllazërive të tija. ⁹ Bijtë e Efraimit i kishin të gjitha këto qytete me fshatrat e tyre si edhe disa qytete të ndara në mes të pronës së bijve të Manaseut.

¹⁰ Bijtë e Efraimit nuk i vranë kananenjtë që banonin në Gazer. Kananenjtë banuan në mes të Efraimajve deri në ditën e sotme si robër pune.

Kapitujt