Kapitujt

Luka: 3. Predikimi i Gjon Pagëzuesit

¹ Në të pesëmbëdhjetin vit të sundimit të Tiberit Cezar, kur Ponc Pilati ishte qeveritari i Judesë, kur Herodi ishte tetrark i Galilesë, Filipi, vëllai i tij, tetrark i krahinës së Ituresë e i Trakonitidës, Lizania tetrark i Abilenës; ² kur Ana e Kajfa ishin kryepriftërinj, fjala e Hyjit i qe drejtuar Gjonit, birit të Zakarisë, në shkretëtirë. ³ Atëherë Gjoni e përshkoi mbarë krahinën e Jordanit duke predikuar pagëzimin e kthimit për falje të mëkateve ⁴ në përkim me sa shkruan në librin e predikimeve të Isaisë profet:

“Zëri i atij që bërtet në shkretëtirë:

përgatitni udhën e Zotit;

rrafshoni shtigjet e tij!

⁵ Çdo luginë le të mbushet,

çdo mal e kodër le të ulet;

udhët e shtrembëra le të bëhen të drejta

e ato gropa‑gropa le të bëhen të rrafshta.

⁶ E çdo njeri do ta shohë shëlbimin e Hyjit.”

⁷ Tashti, Gjoni u thoshte turmave që vinin të pagëzoheshin prej tij:

“Gjarpërinj gjarpërinjsh! Kush ju përkujtoi të ikni prej zemërimit që po vjen? ⁸ Bëni, pra, fryte të denja kthimi dhe mos t’ju shkojë ndër mend të thoni me vete: ‘Kemi atë Abrahamin!’, sepse, unë po ju them: Hyji mund t’i nxjerrë prej këtyre gurëve fëmijë Abrahamit! ⁹ Tashmë sëpata u vu mbi rrënjë të pemëve: çdo pemë që nuk jep fryt të mirë, pritet dhe hidhet në zjarr.”

¹⁰ Atëherë e pyetnin turmat:

“Neve, pra, ç’na duhet të bëjmë?”

¹¹ “Kush ka dy palë petka ‑ u përgjigjej ‑ le t’i ndajë me atë që s’ka. Edhe ai që ka ushqime, le të bëjë kështu!”

¹² Erdhën edhe disa tagrambledhës t’i pagëzojë dhe i thanë:

“Mësues, po ne çka duhet të bëjmë?”

¹³ Ai u përgjigj:

“Mos kërkoni asgjë më tepër se ju është caktuar.”

¹⁴ E pyetën edhe disa ushtarë:

“Po ne, çka duhet të bëjmë?”

Edhe atyre iu përgjigj:

“Askënd mos merrni me të keq! Askënd mos paraqitni rrejshëm dhe jini të kënaqur me rrogën tuaj!”

¹⁵ E pasi populli priste me shpresë dhe pasi të gjithë mendonin në zemrat e veta për Gjonin: a mos është pikërisht ky Mesia, ¹⁶ këndej Gjoni mori fjalën e u tha të gjithëve:

“Unë, vërtet, po ju pagëzoj me ujë, por po vjen një më i fortë se unë, të cilit unë nuk jam i denjë as t’ia zgjidh lidhëset e sandaleve të tij. Ai do t’ju pagëzojë me Shpirt Shenjt e me zjarr. ¹⁷ Ai e mban në dorën e vet terploten për të pastruar lëmin e vet, për të mbledhur grurin në grunarin e vet, kurse bykun do ta djegë në zjarr të pafikshëm.”

¹⁸ E me shumë mësime të tjera ia shpallte popullit Ungjillin.

¹⁹ Ndërkaq Herodi tetrark, të cilin e qortoi Gjoni për shkak të Herodiadës, gruas së vëllait të tij dhe për arsye të të gjitha veprave të tjera të këqija, ²⁰ të gjitha këtyre ua shtoi edhe një: e futi Gjonin në burg.

Pagëzimi i Jezusit

(Mt 3, 13‑17; Mk 1, 9‑11)

²¹ Kur u pagëzua mbarë populli, u pagëzua edhe Jezusi dhe, ndërsa po lutej, u hap qielli ²² dhe Shpirti Shenjt zbriti mbi të në trajtë trupore porsi pëllumb, e prej qiellit ushtoi zëri: “Ti je Biri im ‑ Djali i dishirit. Ty të përkrah plotësisht!”

Breznia ligjore e Jezusit

(Mt 1, 1‑17)

²³ Jezusi, kur filloi veprimtarinë botore, ishte rreth tridhjetë vjeç. Ishte ‑ si kujtonin njerëzit ‑ biri i Jozefit, i Helit, ²⁴ i Matatit, i Levit, i Melkit, i Janait, i Jozefit, ²⁵ i Matatisë, i Amosit, i Naumit, i Heslit, i Nagait, ²⁶ i Mahatit, i Matatisë, i Semeit, i Josehit, i Jodës, ²⁷ i Joananit, i Resait, i Zorobabelit, i Salatielit,

i Nerit, ²⁸ i Melkit, i Adit, i Kozamit, i Elmadamit, i Erit, ²⁹ i Jezusit, i Elizerit, i Jorimit, i Matatit, i Levit, ³⁰ i Simonit, i Judës, i Jozefit, i Jonamit, i Eliakimit, ³¹ i Meleait, i Menait, i Matatait, i Natamit, i Davidit,

³² i Jeseut, i Obedit, i Boozit, i Salait, i Naasonit, ³³ i Aminadabit, i Adminit, i Arnit, i Esromit, i Faresit, i Judës, ³⁴ i Jakobit, i Izakut, i Abrahamit, i Tares, i Nahorit, ³⁵ i Seruhut, i Ragaut, i Falekut, i Eberit, i Salait, ³⁶ i Kainamit, i Arfaksadit, i Semit, i Noehit, i Lamehit, ³⁷ i Matuzalës, i Enokut, i Jaredit, i Maleleelit, i Kainamit, ³⁸ i Enosit, i Setit, i Adamit, i Hyjit.

Kapitujt