Kapitujt

Mikea: 3. Kundër krerëve që shtypin vegjëlinë

¹ Pastaj thashë:

“Dëgjoni, princa të Jakobit,

ju, o krerë, të shtëpisë së Izraelit:

Po a s’është detyrë juaja ta njihni

drejtësinë?”

² Por ju e urreni të mirën dhe e doni të keqen!

Ju njerëzve ua rrjepni me dhunë lëkurën

e prej eshtrave ua shpulponi mishin!

³ Ia hanë mishin popullit tim,

lëkurën ia rrjepin,

eshtrat ia copëtojnë,

siç pritet mishi që piqet në tavë,

porsi mishi që zihet në vegsh!

⁴ Një ditë do ta thërrasin në ndihmë Zotin,

por Ai s’do t’i dëgjojë,

fytyrën e vet atë ditë

prej tyre do ta fshehë,

për veprat e këqija që bënë!

Kundër profetëve mëditës

⁵ Kështu thotë Zoti kundër profetëve

që e ngashnjejnë popullin tim,

që parakallëzojnë paqen

nëse kanë çka të bluajnë me dhëmbë,

e, nëse ndokush nuk ua mbush gojën,

ata kundër tyre shpallin luftë!

⁶ Këndej, në vend të vegimit

natë do të keni,

terr do të keni

në vend të zbulimit;

mbi profetë do të perëndojë dielli,

dita errësirë do t’u bëhet.

⁷ Veguesit do t’i mb’lojë marrja

e dijetarët të turpëruar do të mbesin,

të gjithë buzët do t’i mbulojnë,

sepse s’kanë prej Hyjit përgjigje.

⁸ Kurse unë jam plot fuqi

me forcën e Shpirtit të Zotit,

me drejtësi e me guxim

për t’ia kumtuar Jakobit fajin

e Izraelit, mëkatin e tij!

Përgjegjësve: lajmërim mbi mjerimin e Sionit

Dëgjoni këtu, princa të shtëpisë së Jakobit,

edhe ju, gjykatës të shtëpisë së Izraelit,

që në inat e keni drejtësinë,

që shtrembëroni çdo të drejtë,

¹⁰ që e ndërtoni me gjak Sionin,

me padrejtësi Jerusalemin!

¹¹ Për dhurata krerët e tij gjykojnë,

për shpërblim mësojnë priftërinjtë e tij,

profetët e tij profetizojnë për para.

E guxojnë në Zotin të mbështeten

kur thonë:

‘Pse a s’është Zoti mes nesh?

E këqja mbi ne s’do të bjerë!’

¹² Ja, prandaj, për fajin tuaj,

arë për lavër do të bëhet Sioni,

grumbull gurësh do të bëhet Ruzalemi,

Mali i Tempullit pyll i dendur!

Kapitujt