Kapitujt

Amosi: 7. Vegimi i parë: karkalecat

¹ Ja çka më bëri të shoh Zoti Hyj: ja, Ai

po i krijonte karkalecat në fillim kur nisi të mbijë bari i dytë, ai që del pas kosës së mbretit. ² Kur ata po e mbaronin krejt barin e vendit, unë thashë: “Ki dhimbje, po të lutem, o Zot Hyj! Si do të mund të mbesë gjallë Jakobi? Është aq i vogël!”

³ Zotit i erdhi keq për këtë gjë. “Jo, kjo s’do të ndodhë” ‑ tha Zoti Hyj.

Vegimi i dytë: thatësia

⁴ Ja çfarë më bëri të shoh Zoti Hyj: Ja, Zoti Hyj ftoi zjarrin për të ndëshkuar. Zjarri e përpiu Humnerën e madhe e nisi të përpijë edhe fushën. ⁵ Unë thashë: “Pusho, po të lutem, o Zot, Hyj! Si do të mund të mbesë gjallë Jakobi? Është aq i vogël!”

⁶ Zotit i erdhi keq për këtë gjë. “Jo, as kjo s’do të ndodhë ‑ tha Zoti Hyj.

Vegimi i tretë: mistria

⁷ Ja çfarë më bëri të shoh Zoti Hyj: ja, një njeri po qëndronte mbi mur për t’i dhënë lugë e në dorë mbante mistrinë e muratorit. ⁸ Atëherë Zoti më tha: “Çka po sheh, Amos?” Unë iu përgjigja: “Mistrinë e muratorit”. Atëherë Zoti më tha: “Ja, unë do ta qes mistrinë në mes të Izraelit, popullit tim, e nuk do të vazhdoj më ta fal. ⁹ Do të shemben lartësirat e Izakut e do të shkatërrohen shenjtëroret e Izraelit dhe me shpatë do të ngritem kundër shtëpisë së Jeroboamit”.

Ngatërresa me Amasinë: Amosi dëbohet nga Beteli

¹⁰ Atëherë Amasia, prifti i Betelit, dërgoi njeriun te Jeroboami, mbreti i Izraelit, me këto fjalë: “Amosi po bën përbetim kundër teje në mes të shtëpisë së Izraelit. Vendi nuk do të mund t’i durojë fjalët e tij. ¹¹ Sepse kështu thotë Amosi: ‘Jeroboami do të vdesë prej shpatës e Izraeli do të shpërngulet prej vendit të vet në skllavëri’“.

¹² E Amasia i tha Amosit: “Shporru, o vegimtar! Ik në dheun e Judës. Atje ha bukë e atje profetizo! ¹³ Sa për në Betel mos guxo më të profetizosh, sepse kjo është shenjtërorja e mbretit e tempulli i mbretërisë!”

¹⁴ Atëherë Amosi iu përgjigj Amasisë:

“Nuk jam profet

as s’jam bir profeti,

por jam tubanik e vjelës fiqsh.

¹⁵ Por vetë Zoti më mori

prej pas deleve

e më tha Zotynë:

‘Shko e profetizoji popullit tim, Izraelit!’

¹⁶ Tani dëgjoje fjalën e Zotit: Ti po thua:’Mos profetizo kundër Izraelit e mos prediko kundër shtëpisë së Izakut!’ ¹⁷ Po për këtë arsye kështu thotë Zoti: ‘Gruaja jote do të bëhet lavire në qytet, prej shpatës do të bien bijtë e bijat e tua, toka jote me konop do të ndahet, kurse ti do të vdesësh në vend të papastër dhe Izraeli do të shkojë nga vendi i vet në skllavëri. ’“

Kapitujt