Kapitujt

Jeremia: 1. Në kohën e Jozisë

¹ Fjalët e Jeremisë, birit të Helcisë, një prifti që banonte në Anatot, në dheun e Beniaminit. ² Atij i qe drejtuar fjala e Zotit, në ditët e Jozisë, birit të Amonit, mbretit të Judës, të trembëdhjetin vit të mbretërimit të tij; ³ pastaj edhe në ditët e Joakimit, birit të Jozisë, mbretit të Judës, deri në mbarimin e të njëmbëdhjetit vit të Sedecisë, birit të Jozisë, mbretit të Judës, deri në shpërngulje të Jerusalemit në muajin e pestë.

I. PROFECITË KUNDËR JUDËS E JERUSALEMIT

1. NË KOHËN E JOZISË

Thirrja e Jeremisë

⁴ Fjala e Zotit më qe drejtuar e më tha:

⁵ “Para se të të trajtoja në kraharorin amënor, të njoha

e, para se të dilje nga gjiri amënor, të shenjtërova,

të caktova të jesh profet i popujve.

⁶ Përgjigjja: “Eheu, o Zot Hyj! Po, unë nuk di të flas, sepse jam fëmijë!”

⁷ Por Zoti m’u përgjigj:

Mos thuaj: ‘Jam fëmijë!’

Por shko te të gjithë ata që do të të dërgoj

dhe thuaju gjithçka do të të urdhëroj.

⁸ Mos ki kurrfarë frike para tyre,

sepse unë jam me ty për të të mbrojtur,

‑ është fjala e Zotit.

⁹ Atëherë Zoti e shtriu dorën e vet, ma preku gojën time

e më tha:

“Ja, unë po i vë fjalët e mia në gojën tënde.

¹⁰ Ja, sot po të vë

përmbi popuj e përmbi mbretëri,

për të çrrënjosur e për të rrënuar,

për të shkatërruar e për të shpërndarë,

për të ndërtuar e për të mbjellë.”

¹¹ Fjala e Zotit më qe drejtuar e më tha: “Çfarë po sheh, o Jeremi?” Unë u përgjigja: “Shoh thuprën e bajames vigjiluese.”

¹² Pastaj Zoti më tha: “Mirë pe, sepse unë rri zgjuar mbi fjalën time për ta zbatuar.”

¹³ Më qe drejtuar edhe së dyti fjala e Zotit e më tha: “Çfarë po sheh?” Unë u përgjigja: “Shoh kusinë mbi zjarr të ndezur me grykë që i anon drejt veriut.”

¹⁴ Atëherë Zoti më tha:

“Nga veriu do të hapet e keqja

kundër të gjithë banorëve të dheut.

¹⁵ Sepse, ja, unë po i thërras

të gjitha mbretëritë e veriut”,

‑ është fjala e Zotit.

Ato do të vijnë: secili do ta vërë fronin e vet

në hyrje të dyerve të Jerusalemit,

përballë mureve të tij, rreth e rreth

dhe kundër të gjitha qyteteve të Judës.

¹⁶ Do t’i shpall të gjitha gjyqet e mia kundër tyre

mbi të gjithë keqbërësinë e tyre:

sepse më kanë braktisur

e u kushtuan kem hyjnive të huaja

dhe adhuruan veprën e duarve të veta.

¹⁷ Prandaj ngjeshi ijët e tua!

Në këmbë, pra! Thuaju të gjitha

që unë po të urdhëroj.

Aspak mos u tremb para tyre,

përndryshe do të të bëj që të dridhesh para tyre!

¹⁸ Ja, unë sot ty po të bëj

qytet të fortifikuar,

shtyllë hekuri,

mur tumbaku

përballë të gjithë vendit,

përballë mbretërve të Judës

e princave të tij,

priftërinjve të tij e popullit të vendit.

¹⁹ Ata do të luftojnë kundër teje,

por s’do të ngadhënjejnë mbi ty,

sepse unë jam me ty,

që të të shpëtoj,

thotë Zoti.”

Kapitujt