Kapitujt

Nehemia: 12. Priftërinjtë dhe levitët e riatdhesuar nën Zorobabelin dhe Josuehun Jesuanë

¹ Këta janë priftërinjtë dhe levitët që u kthyen me Zorobabelin, birin e Salatielit, e me Jesuanë:

Saraja, Jeremia, Esdra, ² Amaria, Meluku, Hatusi, ³ Sebenia, Rehumi, Merimuthi, ⁴ Adoja, Gentoni, Abia, ⁵ Miamini, Madiai, Belga, ⁶ Semeja, Jojaribi, Jedaja, ⁷ Selumi, Amoku, Helcia, Jedaja. Këta ishin krerët e priftërinjve e të vëllezërve të tyre në kohën e Jesuasë.

⁸ Levitët: Jezuai, Binuji, Kadmiheli, Serebia, Juda, Matania ‑ ky bashkë me vëllezërit e tij i drejtonte këngët e lavdisë dhe të falënderimit, ⁹ kurse Bekbecia e Haniu me vëllezërit e tyre ndërroheshin me ta në shërbesë.

Pema e breznive të kryepriftërinjve

¹⁰ Jesuait i lindi Joakimi, Joakimit i lindi Eliasibi, Eliasibit i lindi Jojada, ¹¹ Jojadës i lindi Jonatani, Jonatanit i lindi Jeduai.

Priftërinjtë e levitët në kohën e kryepriftit Joakim

¹² Në kohën e Joakimit kryetarët e familjeve të priftërinjve ishin këta: të familjes së Serajës, Maraja; të Jeremisë Hanania, ¹³ të Esdrës Mosolami, të Amarisë Johanani, ¹⁴ të Milikos Jonatani, të Sebenisë Jozefi, ¹⁵ të Haranit Edna, të Majarotit Helciu, ¹⁶ të Adajës Zakaria, të Gentonit Mosolami, ¹⁷ të Abisë Zekriu, të Miamin Moadisë Feltiu, ¹⁸ të Belgës Samuai, të Semajës Jonatani, ¹⁹ të Jojaribit Matanaji, të Jodajës Aciu, ²⁰ të Selajit Celaji, të Amokut Heberi, ²¹ të Helcisë Hasebia, të Jedajës Natanaeli.

²² Në kohën e Eliasibit, të Jojadës, të Johananit e të Jeduasë, qenë numëruar krerët e familjeve të levitëve dhe priftërinjtë deri në kohën e mbretërimit të Dariut të Persisë.

²³ Bijtë e Levit, të zotët e shtëpive, qenë regjistruar në Librin e Kronikave deri në kohën e Jonatanit, të birit të Eliasibit.

²⁴ Krerët e levitëve ishin: Hasebia, Serebia, Jesuai, Binuji e Kadmiheli dhe përbri vëllezërit e tyre që e kishin për detyrë të lavdëronin e të këndonin sipas ndërresave të veta të caktuara nga Davidi, njeriu i Hyjit, ²⁵ ishin: Matania, Bekbecia e Obedia. Ndërsa Mosolami, Telmoni e Akubi ishin derëtarë dhe i ruanin dyert e drithnikëve.

²⁶ Këta jetonin në kohën e Joakimit, të birit të Josua Jozedekut, në kohën e qeveritarit Nehemi e të priftit skrib Esdër.

Shugurimi i mureve të Jerusalemit

²⁷ Për shugurimin e mureve të Jerusalemit u kërkuan levitët nga të gjitha vendbanimet e tyre që të vinin në Jerusalem për ta kremtuar shugurimin me gëzim, me falënderim, me këngë dhe muzikë: me cimbale, me lira e me cetra. ²⁸ Kështu u mbledhën këngëtarët nga rrethinat e Jerusalemit, nga fshatrat e Netufatit, ²⁹ të Betgalgalës e të krahinave të Gabasë e të Azmavetit, sepse këngëtarët kishin ndërtuar për vete vendbanime në rrethet e Jerusalemit.

³⁰ Priftërinjtë dhe levitët u pastruan vetë e pastaj e pastruan popullin, dyert dhe muret.

³¹ Atëherë dhashë urdhër të ngjiten në mur prijësit e Judës dhe i organizova dy kore të mëdha këngëtarësh. Njëri shkoi në anën e djathtë të murit në drejtim të derës së Mbeturinave. ³² Pas tyre shkoi Osaja dhe gjysma e prijësve të Judës: ³³ Azaria, Esdra, Mosolami, ³⁴ Juda, Beniamini, Semeja e Jeremia. ³⁵ Nga priftërinjtë, me bori Zakaria, biri i Jonatanit, biri i Semejës, biri i Matanisë, biri i Mikajës, biri i Zakurit, biri i Asafit; ³⁶ si edhe vëllezërit e tij: Semeja, Azareeli, Malalaji, Galalaji, Maaji, Natanaeli, Juda e Hananiu me veglat muzikore të Davidit, njeriut të Hyjit. Në krye të tyre ecte skribi Esdër. ³⁷ Te dera e Burimit hipën drejt para tyre, afër shkallëve të Qytetit të Davidit, përpjetës murit dhe përpjetës së Pallatit të Davidit, deri te dera e Ujërave, në lindje.

³⁸ Kurse kori i dytë, ata që e bënin falënderimin, ecte në anën e kundërt dhe unë ecja pas tij e me mua gjysma e krerëve të popullit nëpër mur e nëpër pirgun e Furrave deri te Muri i Gjerë, ³⁹ mbi Derën e Efraimit, përmbi Derën e Vjetër, mbi derën e Peshqve, pirgun Hananeel, pirgun Meah deri te dera e deleve. U ndalëm te dera e Rojës.

⁴⁰ Pastaj dy koret i zunë vendet e veta në Shtëpinë e Hyjit. Me mua ishte gjysma e bujarëve, ⁴¹ dhe priftërinjtë me bori: Eliakimi, Maasia, Miamini, Mikeja, Elioenaji, Zakaria e Hanania, ⁴² Maasia, Semeja, Eleazari, Aciu, Johanani, Melkia, Elami e Ezeri. Këngëtarët këndonin nën drejtimin e Jezraisë.

⁴³ Atë ditë u kushtuan fli të mëdha dhe u bë gëzim i madh. U gëzuan pa masë edhe gratë e fëmijët e tyre dhe jehona e haresë së Jerusalemit u dëgjua larg.

Një epokë ideale

⁴⁴ Në atë kohë u caktuan njerëzit për t’i mbikëqyrur dhomat e ruajtjes së kushteve, të fryteve të para, të të dhjetave dhe për t’i mbledhur nga arat përreth qyteteve pjesët që Ligji ua cakton priftërinjve dhe levitëve. Vërtet Juda iu gëzua priftërinjve dhe levitëve që ishin në shërbim ⁴⁵ dhe shërbesonin në shërbesë të Hyjit të vet dhe në shërbesë të pastrimit ‑ së bashku me këngëtarë e me derëtarë sipas rregulloreve të Davidit e te Salomonit, të birit të tij. ⁴⁶ E njëmend moti që prejkohës së Davidit e të Asafit, ishin krerët e këngëtarëve dhe kishte këngë lavdie dhe falënderimi për nder të Hyjit. ⁴⁷ Prandaj edhe mbarë Izraeli në kohën e Zorobabelit e të Nehemisë i jepte çdo ditë pjesët e caktuara për këngëtarë dhe derëtarë. Izraeli ua jepte levitëve pjesët e kushtuara dhe levitët ua jepnin priftërinjve pjesët që u takonin.

Kapitujt