Kapitujt

2 i Kronikave: 14. Paqja e Asës

¹ Asa bëri atë që ishte e mirë dhe e pëlqyeshme para syve të Zotit, Hyjit të vet. I zhduki lterët e hyjnive të huaja dhe lartësirat, ² i theu shtyllat dhe i preu banirët, ³ i urdhëroi Judës ta kërkojë Zotin, Hyjin e etërve të vet, ta zbatojë Ligjin dhe të gjitha urdhërimet. ⁴ I zhduki prej të gjitha qyteteve të Judës lartësirat, lterët e kemimit dhe mbretëroi në paqe. ⁵ I rindërtoi qytetet e fortifikuara të Judesë, pasi vendi ishte në qetësi, dhe në kohën e tij nuk u bë asnjë luftë sepse Zoti i dhuroi paqe.

⁶ Asa i tha Judës: “Ejani t’i ndërtojmë këto qytete, t’i rrethojmë me mure, t’i forcojmë me pirgje, me dyer e me shula deri që të gjitha t’i kemi në qetësi, pa luftë. Ne e kërkuam Zotin, Hyjin tonë; po ashtu edhe ai na kërkoi ne e na dha paqe kudo përreth”.

Ata rindërtuan dhe përparuan. ⁷ Asa pati edhe një ushtri të armatosur me shqyta e me heshta: treqind mijë prej Judës, kurse ushtria që e kishte prej Beniaminit ishte e armatosur me shqyta e me shigjeta dhe ishin dyqind e tetëdhjetë mijë: të gjithë këta trima të fortë.

Sulmi i Zarës

⁸ Zara nga Etiopia u sul kundër tyre me një ushtri prej një milion ushtarësh e me treqind karroca lufte dhe arriti deri në Maresë. ⁹ Po edhe Asa vrapoi t’i dalë përpara dhe e rreshtoi ushtrinë për luftë në luginën që është në veri të Maresës. ¹⁰ Asa e thirri në ndihmë Zotin, Hyjin e vet, e tha: “O Zot, për ty s’ka aspak rëndësie nëse po u ndihmon atyre që janë shumë apo pak! Na eja në ndihmë, o Zot, Hyji ynë! Me shpresë në ty dhe në Emrin tënd dolëm kundër kësaj shumice! Ti, o Zot, je Hyji ynë, të mos ngadhënjejë mbi ty njeriu!”.

¹¹ Këndej edhe Zoti i tmerroi etiopët para Asës e Judës: etiopët ikën! ¹² Asa dhe ushtria, që ishte me të, i ndoqën deri në Gerar. Etiopët sharruan deri në shfarosje, sepse qenë zhdukur duke i vrarë Zoti e duke i luftuar ushtria e tij. Këndej edhe morën pre të madhe ¹³ dhe i goditën të gjitha qytetet në rrethinën e Gerarës: i kishte pushtuar tmerri i Zotit. I rrafshuan të gjitha qytetet dhe morën pre të madhe me vete. ¹⁴ U ranë edhe bunave të grigjave, morën një shumicë të panumërt delesh e devesh dhe u kthyen në Jerusalem.

Kapitujt